Plogen
Plogen er ein viktig reiskap på garden. I denne filmen kan du lære korleis ein plog er bygd opp, og korleis sjølve pløyinga går føre seg.
Vendeplog
Ein vendeplog har skjer på begge sider slik at han kan vendast på enden av jordet, og ein kan køyre fram og tilbake i motsett retning, men likevel vende jorda same veg.
Teigplog
Alternativet til vendeplog er teigplog. Han har skjer berre på ei side og krev derfor at ein planlegg køyremønsteret på jordet på ein annan måte.
Pløyedjupne
Vanleg pløyedjupne er cirka 20 cm. Ei djupare pløying (ned til 25 cm) kan vere nyttig for å kjempe mot ugras, for å prøve å løyse opp i tidlegare pakkskadar eller viss du skal dyrke til dømes poteter, som trivst i eit djupt og laust jordlag. For korn og gras kan cirka 15 cm pløyedjupne vere nok.
Tidspunkt for pløying
Ved dyrking av eittårige vekstar (til dømes korn) er det vanleg å pløye om våren, som starten på våronna, eller rett etter at kornet er hausta om hausten. Faren ved å pløye om hausten er at jorda blir liggande "naken" (altså utan plantedekke) gjennom vinteren, noko som gir auka fare for erosjon og avrenning.
Erosjon betyr at vatnet grev i jordmassane og flyttar på jorda. Avrenning fører til at vatnet vaskar ut næringsstoff frå jorda, og dette kan renne vidare ut i vassdrag og bidra til overgjødsling av ferskvatn og hav. Fordelen kan vere at du får eit forsprang på våronna når våren kjem, fordi du allereie er ferdig med den første arbeidsoppgåva.