Hopp til innhald
Nynorsk

Fag

Oppgåve

Bruk av digitale ressursar

I helsetenesta blir det brukt digitale ressursar som nettsider, appar og faglege plattformer for å gi informasjon og rettleiing. I denne oppgåva får du øve på å ta i bruk slike ressursar til å gi instruksjon og rettleiing på ein profesjonell måte.
Apotekteknikar skannar ei eske med legemiddel. Foto.

Lag ein instruksjonsvideo

Du jobbar på eit apotek. Ein kunde kjem for å hente astmamedisin, men har aldri brukt det før. Oppgåva di er å gi kunden tydelege og korrekte instruksjonar om rett bruk.

Del 1. Bli kjend med legemiddelet

  1. Gå inn på Felleskatalogen. Søk og finn informasjon om ein aktuell astmamedisinen, til dømes Ventoline.

  2. Sjå instruksjonsvideoane som ligg på same side.

  3. Noter viktige punkt om

  • korleis medisinen skal brukast

  • vanlege feil som bør unngåast

  • eventuelle tips for å sikre rett inhalasjon

Del 2. Korleis gi god instruksjon?

Noter stikkord og diskuter med ein medelev.

  1. Kva må du tenke gjennom før du skal gi instruksjon?

  2. Kva er viktige opplysningar som må vere med når du skal gi instruksjon?

  3. Korleis gir du god instruksjon? Tenk både på kva du seier, og korleis kroppsspråket ditt er.

Del 3. Lag ein instruksjonsvideo

Lag ein kort video (1–3 minutt) saman med ein medelev der de rettleier kvarandre i bruk av reseptfrie legemiddel. Vel legemiddelgruppe sjølv. Byt roller, slik at begge får øve på å rettleie.

Videoen skal

  • vise rett framgangsmåte

  • bruke eit språk som er lett og tilpassa kunden

  • ha tydeleg struktur (introduksjon – demonstrasjon – oppsummering)

Del 4. Vurder eigen video

Sjå gjennom videoen og vurder han ut frå desse spørsmåla:

  1. Er instruksjonen enkel å forstå?

  2. Blir framgangsmåten vist tydeleg og i rett rekkefølge?

  3. Er språket og formidlinga tilpassa kunden?

To personar i uniform for helsepersonell ved ein pc-skjerm. Foto.

Rettleiing av nytilsett

Du har ansvar for å rettleie ein nytilsett kollega på arbeidsplassen din. Vel arbeidsplass sjølv. Du skal vise korleis ein bruker ein digital ressurs som er relevant i helseservicearbeid, til dømes Felleskatalogen, Helsenoreg, FHI, e-resept, ein helseapp eller nettsider til fagforeiningar og helseorganisasjonar. Du kan bruke mobil, pc eller nettbrett – vel det som passar best.

Del 1. Vel ein digital ressurs

Vel ein ressurs som er nyttig i det yrket du har valt, til dømes

  • Helsenorge.no

  • Felleskatalogen

  • Folkehelseinstituttet (fhi.no)

  • helse-appar (vel ein app)

  • nettsida til fagforeiningar eller helseorganisasjonar

Del 2. Utforsk tenesta

  1. Kva blir ho brukt til?

  2. Kven er ho relevant for?

  3. Kva funksjonar er nyttigast i arbeidskvardagen?

Del 3. Planlegg rettleiinga

  1. Korleis vil du gå fram for å finne ut kva den nye kollegaen din allereie kan om digitale ressursar?

  2. Kva er hovudbodskapen i den digitale ressursen?

  3. Korleis kan du forklare og vise fram ressursen på ein enkel og forståeleg måte?

  4. Korleis opptrer og kommuniserer du slik at den andre opplever meistring? Tenk på kroppsspråk og veremåte og ordval og klarleik.

  5. Korleis viser du empati og forståing og respekt for ein nytilsett som ikkje har same kunnskap som deg?

Del 4. Lag ei brukarrettleiing eller munnleg demonstrasjon

Du kan velje ein av desse metodane:

  1. Lag ei digital brukarrettleiing. Bruk tekst og bilete for å lage ein enkel guide (Word eller PowerPoint).

  2. Lag ein munnleg presentasjon med demonstrasjon. Presenter ressursen for klassen og vis korleis han blir brukt i praksis.

Del 5. Reflekter og diskuter

Etter at du har presentert, reflekter saman med klassen.

  1. Korleis kan digitale ressursar bidra til betre kvalitet i helsetenesta?

  2. Kva for nokre etiske dilemma kan oppstå ved bruk av digitale ressursar?

  3. Korleis varetek vi personvern og pasientsikkerheit ved bruk av digitale ressursar?

  4. Korleis påverkar relasjonar kommunikasjon og rettleiing?

  5. Korleis kan fagkunnskap, haldningar og ferdigheiter påverke samarbeidet med ein nytilsett kollega?

  6. Korleis kan du bruke denne erfaringa i framtidig yrkesliv?

Skrive av Siv Stai og Therese Lindahl Carlsen.
Sist oppdatert 18.12.2025

ForrigeTilbake til emnet