Musikk som identitetsmarkør

I denne oppgåva skal vi sjå på korleis musikk er ein identitetsmarkør i utdrag frå to bøker.

Ein identitetsmarkør er meir eller mindre bevisste val menneske tek for å markere identitet. Mellom anna kan val av klede vere med på å forme identiteten din. Det same gjer måten du snakkar på. I tillegg kan altså musikken du høyrer på, vise både individuell tilhøyrsel og gruppetilhøyrsel.

Sit saman i grupper. Diskuter dei tre påstandane under:

• Musikken du høyrer på, seier mykje om deg som person.
• Somme musikksjangrar er betre enn andre.
• Eg høyrer berre på bra musikk.
• Musikken eg høyrer på, er med på å markere identiteten min.

Avslutt med å fortelje kvarandre kva slags musikk de høyrer på. Meiner dei andre på gruppa at musikkvalet ditt definerer deg som person?

Du skal straks lese utdrag frå to tekstar der eg-personane høyrer på hiphop. Handlinga er lagt til 1990- og tidleg 2000-talet, då hiphop framleis ikkje blei rekna som mainstream-musikk.

Sjå dokumentaren på NRK.no om då hiphopen kom til Noreg: "Takin Ova - Historien om norsk hiphop". Noter ned svar på spørsmåla under:

• Kva fortel intervjuobjekta at tiltaler dei ved hiphop?
• Korleis viser dokumentaren at hiphop og identitet høyrer saman?
• Hiphop er opphavleg ein subkultur. Det var ein sjanger som gjekk mot gjengse normer og verdiar. Korleis synest du det kjem til syne i dokumentaren?
• Korleis var hiphop ein identitetsmarkør då han kom til Noreg?

Les tekstutdrag 1 frå Tante Ulrikkes vei om Jamal og utdraget frå Third Culture kids av Leo Ajkic.

1. Peik på delar av teksten som viser at Jamal og Leo Aikic ser på seg sjølv som outsiderar i Noreg.
2. Trekk ut sitat som viser kor viktig musikken er for dei.
3. Kjenner du musikken dei høyrer på? Viss ikkje – finn fram musikkvideoar og høyr på nokre av artistane dei nemner. Korleis vil du karakterisere musikken?
4. Lag ein kort presentasjon av dei to figurane, der du viser korleis dei bruker musikk som identitetsmarkør. Legg vekt på samanlikne dei i presentasjonen. Hugs å bruke sitat frå utdraga.