Analyser ein reklame frå Tine

Del 1: Utforsk reklamen

Sjå reklamefilmen frå Tine under (lengde 00:15).

1. Kva er bodskapen i reklamefilmen?

2. Kven er målgruppa for reklamen?

3. Kven er avsendar av reklamen?

4. Kva betyr idiomet "heilt i tåka"?

   • Tips: Viss du ikkje veit kva det betyr, kan du slå opp ordet "tåke" i ordbøkene.no eller i LEXIN.

5. Forklar kva dei meiner med spørsmålet "Helt i tåka før frokost?".

6. Korleis blir idiomet "heilt i tåka" brukt i filmen?

   • Kva skjer med jenta i filmen og tåka rundt henne etter at ho har drukke mjølk?

7. I reklamen blir det spelt av ein engelsk song med desse tekstlinjene "Brush off the clouds and cheer up, put on a happy face." Omsett til norsk betyr det: "Børst av deg skyene og smil, let som du er glad."

   • Korleis er samspelet mellom songtekst, melodi og handling i reklamefilmen?

8. Korleis bruker Tine logoen sin i reklamen? Gi døme på stader i reklamefilmen der logoen blir vist.

9. Korleis er positivt ladde ord brukte som verkemiddel i reklamefilmen?

10. Korleis påverkar reklamen kjenslene dine (patos)? Forklar med eit døme frå filmen.

Del 2: Skriv ein reklameanalyse

Skriv ein reklameanalyse. Du kan bruke svara dine på nokre av spørsmåla i del 1 som hjelp når du skriv. Punkta under viser kva som bør vere med i analysen. Skriv teksten din som ein samanhengande tekst med avsnitt.

Passande overskrift (som gjerne seier noko om bodskapen)

Innleiing

• presentasjon av reklamen: kven som er avsendar, og kva det er reklame for

Hovuddel

• målgruppe

• viktige verkemiddel

• bruk av appellformer

• bodskap

Avslutning

• vurdering av om reklamen når ut til målgruppa med bodskapen eller ikkje

Del 3: Lag ein reklamefilm

1. Jobb saman i små grupper. Lag ein eigen reklamefilm for eit valfritt produkt der ungdom og unge vaksne på alder med deg er i målgruppa. Pass på at reklamen ikkje kan verke støytande på nokon. Bruk nokre av dei same verkemidla som er brukte i reklamefilmen frå Tine, som til dømes:

   • samspel mellom tekst, handling og musikk

   • idiom

   • kontrastar

2. Vis reklamefilmen de har laga, for kvarandre. Forklar korleis de har tenkt for å nå målgruppa med verkemidla i reklamen.