Fag

Fagstoff

Video

Komposisjonsprinsippet tredeling

Komposisjon handlar om å setje saman delar til ein heilskap. Nokre prinsipp blir brukte for å styre betraktarens blikk i biletflata eller for å forsterke verknaden av noko. Tredelingsprinsippet kan hjelpe deg til å skape balanse og ein spennande komposisjon.

Korleis kan du bruke tredeling?

Tredeling er eit enkelt prinsipp du kan bruke til å skape gode, harmoniske komposisjonar. Det blir brukt i fotografi, film, grafisk design og sjølvsagt i kunst. Du kan sjå døme på dette i filmen under (lengde 2:59).

Video: Klipp og lim / CC BY-SA 4.0

Komposisjon av eit bilete

Tenk deg at du skal lage eit bilete. Formatet skal vere liggande, det vil seie at breidda på arket er lengre enn høgda. Dette blir òg kalla landskapsformat, og det passar godt til dette dømet. Motivet skal vere ei strand der eit barn spring med ein drake.

Når du skal komponere dette biletet, må du ta nokre val. Korleis vil du fordele landskapet på biletflata? Skal utsnittet vise mest av stranda og litt av sjøvatnet som skyl inn mot land? Kva med himmelen? Kor mykje av han skal vere med? Kvar vil du plassere barnet? Kva med draken?

Skisse med fargar. Eit barn spring på ei strand med snora til ein drake i handa. Barnet er plassert langs ei av dei vertikale tredelingslinjene. Illustrasjon.

Bruk hjelpelinjer

Det blir enklare å begynne på komposisjonen din når du har fått på plass hjelpelinjene etter tredelingsprinsippet:

Bruk to vertikale linjer til å dele biletflata inn i tre like store delar i breidda.
Bruk to horisontale linjer til å dele biletflata inn i tre like store delar i høgda.

I praktisk arbeid held det å bruke augemål for å setje opp inndelinga.

Utrekning av ein tredjedel

Når du skal rekne ut kor stor ein tredjedel er, tek du breidda og deler på tre.
For A2-format blir det

594 mm : 3 = 98 mm

Tilsvarande deler du høgda på tre. For A2-format blir det

3420 mm : 3 = 140 mm

To loddrette og to vassrette linjer deler arket i ni like store felt. Illustrasjon. — Slik deler hjelpelinjer arket eller lerretet opp etter tredelingsprinsippet.

Du kan bruke dei linjene som går horisontalt, til å plassere horisonten og overgangen mellom sjø og strand.

Landskapsskisse med hjelpelinjer. Illustrasjon. — Hjelpelinjene kan brukast til å plassere kvar stranda, sjøen og himmelen skal vere i biletflata. Legg merke til at det ikkje er noko krav å følge linjene heilt nøyaktig. Du må vurdere korleis du kan få alt til å henge fint saman.

Dei vertikale linjene kan hjelpe deg med å plassere barnet, draken og eventuelt andre element du ønsker å inkludere i komposisjonen.

Skisse. Barn spring med drake. Barnet er plassert langs ei av dei vertikale tredelingslinjene. Illustrasjon. — Barnet med draken er blikkfanget i denne komposisjonen. Dei vertikale linjene er brukte for å finne ei god plassering. Det gir harmonisk balanse i biletet.

Det som trekker til seg merksemda til sjåaren kallar vi blikkfang. Dei fire kryssa som oppstår der dei horisontale og dei vertikale linjene møter kvarandre, vil vere spesielt gode område for å plassere hovudmotivet i komposisjonen din.

Eit viktig poeng å ta med er at både linjer og kryss er rettleiande hjelpelinjer for kvar du kan plassere ulike element. Av og til ser du at du må bryte regelen for å få fram motivet ditt. Vurder alltid kva du synest fungerer best, ut frå kva du ønsker å formidle.