Anatomi og skissebok

Tips til læraren

Vi tilrår å bruke dei andre ressursane i emnet "Teikn menneske" som inngang til dette arbeidsoppdraget. Elevane som har bidrege med biletdøme, hadde ei tidsramme på 14 skuletimar på oppgåva si.

I tillegg går det an å fordjupe seg i grunnleggande anatomi og setje namn på musklar og skjelett. Vi tilrår òg å jobbe med teiknemodelldokker om de har tilgang til det.

Fagord

Anatomi

Anatomi er læra om oppbygginga av kroppsdelane.

Aktteikning

Aktteikning er å teikne ein naken eller lett tildekt modell.

Kroki

Kroki er å teikne raske skisser av ein modell for å få fram det karakteristiske i rørsle og kroppsstilling.

Studieteikning

Studieteikning er ei teikning som er meir gjennomarbeidd og detaljert enn ei skisse eller krokiteikning og blir ofte brukt som eit forarbeid i kunsten. Det er viktig å studere motivet nøye og bruke sikteteknikk. Ofte teiknar vi fleire varierte teikningar frå ulike vinklar, og i ei studieteikning kan vi teste ut ulike teknikkar.

Forkorting

Forkorting er når eit menneske blir framstilt med forkorta proporsjonar for å skape perspektiv.

Positur

Positur betyr kroppsstilling. I biletkunst bruker vi omgrepet om måten ein modell blir stilt opp på for å uttrykke eller framheva stemningar.

Kontrapost

Kontrapost er ei avslappa, naturleg stilling brukt i biletkunst og skulptur. Mennesket som står og kviler vekta på den eine foten, får ein knekk i hofta. Vinkelen i skuldrene vil naturleg fungere som motvekt til vinkelen på hofta. Rørsla frå hovudet, brystet, hoftene og ned mot føtene dannar på den måten ei slags S-form.

Tema

Vel eit tema innanfor anatomi. Det kan til dømes vere skjelett, musklar, hender, føter, heil- eller halvfigur eller spesielle positurar, som kontrapost . Du kan òg velje forkorting og utforske kva som skjer når eit menneske blir framstilt med forkorta proporsjonar for å skape perspektiv. (Sjå nærmare forklaringar av omgrepa under "Fagord" lenger opp på sida.)

Du kan starte med eit tankekart eller liknande i byrjinga av prosessen din. Grunngi deretter kva, korleis og kvifor du vil utforske det anatomitemaet du har valt.

Utforsking

Utforskinga skal gå i djupna. Jobb derfor både med skisse- og studieteikning og eventuelt kroki, som du kan lese meir om i denne artikkelen. Bruk ulike teknikkar. Planlegg tida og arbeidsmåten din godt.

Frodig prosess i skissebok

Jobb med komposisjon, og prøv å få ein kunstnarisk kvalitet på sidene i skisseboka di.

• Ver kreativ og bruk kontrastar i storleik, teknikk og fargebruk.

• Bruk overskrifter for å vise fram utvikling i prosessen din.

• Flett inn relevant informasjon om anatomi.

• Bruk fagomgrep og beskriv korleis du har brukt visuelle verkemiddel som til dømes teknikk, fargar og komposisjon.

To komposisjonsforslag

I prosessens siste del skal du bruke utforskinga di til å lage to ulike komposisjonsforslag i A5- eller A4-format i skisseboka di.

Du står fritt til å velje teknikk, fargebruk, uttrykk og bodskap. Prøv deg fram før du bestemmer deg for utforminga av dei to komposisjonane. Jobb så grundig som du har tid til.

Mål for komposisjonane:

• Proporsjonane og utforminga av anatomidelen/-delane skal sjå mest mogleg naturleg ut.

• Komposisjonane skal ha tydeleg samanheng med temaet du har utforska.

• Komposisjonane skal uttrykke rørsle.

Refleksjon og eigenvurdering

Svar skriftleg på spørsmåla under:

1. Kva har du lært om anatomi gjennom oppgåva?

2. Kva synest du var mest interessant og nyttig?

3. Kva er du mest nøgd med i arbeidsprosessen din?
   Grunngi kvifor.

4. Kva for eit av komposisjonsforslaga dine liker du best?
   Forklar kvifor.