Fagartikkel
Vitamin E
Vitamin E verkar som ein antioksidant i kroppen og bidreg til å verne cellene våre og halde dei friske. Vitaminet er med på å verne feittet i celler og vev mot skadeleg nedbryting og celleskadar. Vitamin E hindrar òg oksidering av vitamin D og A.
Plantemargarin, planteoljer, nøtter og frø inneheld mykje vitamin E. Bilete: NTB scanpix, Bon Appetit / CC BY-NC-SA 4.0
Mangel på E vitamin er sjeldan. Det rammar først og fremst for tidleg fødde barn og personar med sjukdommar som gir dårleg opptak frå tarmen. Mangelen kan føre til svakare musklar og nedsett smerte- og berøringskjensle.
Gode kjelder til vitamin E er mjuk margarin, sammale mjøl og brød, vegetabilske oljer, avokado, egg, nøtter og tran. Vitamin E oksiderer svært lett, særleg ved oppvarming og kontakt med lys og luft, og blir raskt øydelagt ved djupfrysing.