Pïeren orre motovre-sygkele

Piere motovre-sygkelem ohtsede

Abpe jaepiem Piere beetnegh spååreme, jïh daelie edtja motovre-sygkelem åestedh. Åå, guktie Piere geasan aavode! Daate giesie gujht buerebe sjædta goh evtebe giesie, Piere ussjede.

Fïerhten biejjien gaskeviermesne ohtsede. Sæjhta bööremes sygkelem gaavnedh, men ij maehtieh fer dovres årrodh. Piere tuhtjie geerve, juktie dïhte bööremes sygkele aaj dïhte dovremes. Jïh dïhte aelpemes sygkele lea nåakemes, Piere ussjede. Magkere motovre-sygkele dovne aelpies jïh hijven? Minngemosth Piere aktem sygkelem gaavna. Tjuara doekijasse ringkedh sygkelen bïjre gihtjedidh.

Vaestedh!

1. Mannasinie Piere ussjede daate giesie buerebe sjædta goh minngemes giesie?

2. Gusnie Piere sygkelem gaavna?

3. Mij sygkelidie Piere ussjede nåakemes?

4. Mij sygkelidie dïhte bööremes?

Piere doekijasse ringkie.

Doekije: Buerie biejjie! Åvla daate.

Piere: Buerie biejjie! Mov nomme Piere. Manne gaskeviermesne vööjnim datne motovre-sygkelem doekh.

Doekije: Jaavoe, dïhte gujht reaktoe.

Piere: Manne motovre-sygkelem giesien daarpesjem, mohte tuhtjem daate sygkele ånnetji dovres.

Doekije: 25 000 kråvnah ij leah dovres. Daan sygkelen mïerhke lea TC 125, jïh dïhte joekoen buerie. Manne tuhtjem Husqvarna sygkelh dah bööremes.

Piere: Man båeries dïhte?

Doekije: Daate sygkele jaepeste 2016, jïh doen våhkoen manne servicem darjoejim.

Piere: Mah datne provhkh servicem fïerhten jaepien darjodh?

Doekije: Jaa, hævvi. Fïerhten gïjren. Dïhte gujht joekoen vihkele.

Piere: Hijven. Man gåhkese datne sygkelem vuajeme?

Doekije: Medtie 12000 kilomeeterh. Sïjhth pryövedh sygkelem vuejedh?

Piere: Nov maa sïjhtem. Mah datne gåetesne laavvadahken?

Doekije: Manne gujht gåetesne abpe laavvadahken.

Piere: Hijven! Voejnesien dellie!

Doekije: Voejnesien! Jïh buerie båeteme!

Vaestedh!

1. Soptsestallemisnie njielje taalh, buerkesth taalide:

   • 25 000

   • 12 000

   • 2016

   • 125

2. Maam Piere edtja laavvadahken darjodh?

3. Gåessie Piere motovre-sygkelem daarpesje?

4. Mij lea vihkeles motovre-sygkelinie fïerhten jaepien darjodh?

5. Mah datne tuhtjh Piere daarpesje vielie sygkelen bïjre gihtjedidh? Tjaelieh vielie gyhtjelassh doekijasse.

6. Gaavnh bïevnesh soptsestallemisnie jïh tjaelieh motovre-sygkelen bïjre.
   

Piere tjomperde

Aehtjie: Guktie datnine daelie? Datne aavodh?

Piere: Jaavoe, aavodem gujht mohte aaj tjomperdem.

Aehtjie: Mannasinie datne tjomperdh?

Piere: Im raakte daejrieh guktie daate motovre-sygkele lea gosse ajve guvvesne vuajnam. Ussjedh jis dïhte slahtjan.

Aehtjie: Aellieh tjomperdh. Manne edtjem viehkiehtidh dam sygkelem eensi-laakan kraanskodh gosse doekijen luvnie. Vïenhtem TC125 dutnjien sjeahta.

Piere: Manne aavodem pryövedh sygkelem vuejedh. Dellie åadtjoem daejredh guktie dïhte jåhta jïh jis naan fïejlh åtna.

Aehtjie: Vihkele aaj daejredh jis dïhte rååsteme. Men mujhtieh, ih åadtjoeh ennje geajnosne vuejedh.

Piere: Sööfe badth sov motovre-sygkelem geajnosne vööji eannan vuejeme-leahpam veelti. Manne gujht daarpesjem geasan haarjanidh vuejedh.

Aehtjie: Nov sån daarpesjh haarjanidh vuejedh, men ij leah luhpie geajnosne. Vïenhtem datne joe Sööfen sygkelem gellien aejkien pryöveme.

Piere: Kaanne naan aejkien...

Vaestedh!

1. Mannasinie Piere tjombperde?

2. Mannasinie Piere aavode?

3. Maam Piere ussjede vihkele kraanskodh gosse doekijen luvnie?

4. Maam aehtjie ussjede vihkele?

5. Mannsinie ij Piere åadtjoeh ennje geajnosne vuejedh?

6. Gusnie datne vïenhth Piere maahta haarjanidh motovre-sygkelem vuejedh?