Framgangsmåte
Du skal løyse to ulike oppgåver. Arbeidet bør du dele opp i fleire fasar:
- Første steg er idéfasen med idéutvikling. Her er skisser og utforsking viktig. Lag minst fem skisser med ulike motiv og uttrykk per oppgåve. Lag di eiga form på munnbindet, eller bruk ein av dei vedlagde malane.
- I neste fase skal du velje ut og vidareutvikle eitt eller to design frå idéfasen. Bruk eit grafisk program og lag ei grafisk framstilling av tøymunnbindet, strekt ut som vist i malane. I tillegg skal du lage ei skisse som viser eit ansikt som har på munnbindet, for å vise munnbindet i bruk.
- Du skal dokumentere prosessen undervegs og skrive notat om arbeidet.
- Til slutt skal du lage eit lite hefte der du samlar skisser, utprøvingar, notat og ferdige produkt.
Oppgåve 1: Lag eit mønster
Sjå for deg ei målgruppe, beskriv ho med omsyn til kjønn, alder, interesse og klesstil. Design deretter eit mønster som skal dekkje munnbindet og som kan appellere til målgruppa. Du kan i tillegg lage ein logo eller skrive eit namn på munnbindet om du vil.
Oppgåve 2: Lag merchandise
Lag tøymunnbind-merchandise til eit band, ein artist, eit idrettslag, ein russegruppe, til ein influensar eller liknande. Sett deg inn i den visuelle stilen til personen eller gruppa du skal lage merchandise for.
Oppgåve 3: Dokumenter arbeidet
Lag eit hefte der du viser fram både skisser og ferdige design, og der du forklarer arbeidsprosessen frå idé til ferdig design. Bruk bilete og tekst, og trekk inn faguttrykk.
Argument for
- val av design
- behova til målgruppa
- visuell stil (gjeld oppgåve 2)
Filer
Informasjon om ulike munnbind
Det finst fleire typar munnbind. Felles for dei er at dei skal sitje tett til ansiktet, dekkje nase, munn og kinn og kunne trekkjast godt under haka.
Tøymunnbind
Tøymunnbind er laga av tøy, og produksjonen av dei har ikkje bestemte standardkrav. Det er heller ikkje klart kor godt tøymunnbind vernar mot smitte. Tøymunnbinda kan gjenbrukast etter vask, og dei skal vaskast etter at dei er brukte. Dei skal vaskast i vaskemaskina på 60 grader. Regjeringa viser til oppskrifta for produksjon av tøymunnbind laga av Standard Norge. Du kan laste ned pdf-en med oppskrifta gratis.
NRK Livsstil har intervjua Ingrid Vik Lysne, som viser ein framgangsmåte for å sy eigne munnbind.
Medisinske munnbind
Den andre hovudtypen munnbind blir kalla for medisinske munnbind. Desse kjøper du på apoteket. Det finst fleire klassifiseringar på munnbinda. Vanlege reisande skal bruke munnbind klasse I, som har god filtrering. Helsepersonell bruker munnbind med endå betre filtrering (klasse II, IIR) eller munnbind som er andedragsvern.