Mønsterelement
Ei form er alltid utgangspunktet for eit mønster. Formene vi gjentek i eit mønster, kallar vi for eit mønsterelement. Under ser du ei enkel geometrisk form til venstre, og til høgre ser du eit mønsterelement som er sett saman av organiske former.
Rapport
Du kan setje mønsterelementet saman i ulike system. Ein rapport er den minste delen som du gjentek i mønsteret. Du kan samanlikne rapporten med ein byggjekloss som du bruker i mønsterbygging.
Bord
Viss du gjentek rapporten i lengderetning, lagar du ein bord. Ein bord kan vere horisontalt eller vertikalt. I døma under er rapportane gjentekne horisontalt.
Flatemønster
Gjentek du rapporten både i lengda og i breidda, skaper du eit flatemønster.
Ornament
Eit ornament er eit formelement som kan stå åleine eller vere ein del av eit samansett mønster. Det blir brukt som dekor eller utsmykking. Formene blir gjentekne rytmisk. Du kan til dømes dreie dei rundt eit punkt.
Rotasjonssymmetri
Når vi speglar ei form rundt eit midtpunkt, bruker vi rotasjonssymmetri. Då kan vi rotere mønsteret ein viss vinkel, utan at forma endrar seg. Åttebladrosa er eit godt døme på dette.
I filmen under ser du korleis vi kan bruke brikker og vinkelspegel til å prøve ut rotasjonssymmetri.
Mønsterbruk i tekstilar
Utforsk formuttrykk frå ulike tider
Formuttrykk blir påverka av stilar og mote. Dette gjeld òg for mønster. Søk til dømes på tapet frå 1970- og 1980-talet, og sjå kor ulik form- og fargebruken var.