Gråtonane mellom svart og kvit opplever vi ulikt, alt etter kva for fargar dei står saman med. Ein mellomgrå vil sjå mørkare ut saman med kvitt enn saman med svart. På same måte vil ein mellomblå farge virke lysare saman med mørke fargar og mørkare saman med lyse fargar.
Valør
Vi kallar gråtonane mellom kvit og svart for valørar. Dei ulike gråtonane har ulik lysheit.
Vi brukar også valør når vi beskriv lysstyrken i dei kulørte fargane. Lysheitsgraden i ein farge kan målast i forhold til gråtoneskalaen.
Gul er den lysaste fargen, og lilla er den mørkaste. Ved å blande inn kvitt eller svart endrar vi valøren i fargane og får ulike nyansar.
Lys-mørk-kontrast
Kontrasten mellom lys og mørk oppstår når lyse og mørke fargar blir plasserte saman. Dette kan du bruke til å skape spenning i ein komposisjon.
Korleis blir lys-mørk-kontrasten brukt i bilete?
Søk etter bilete med lys-mørk-kontrast på nettet. Vurder korleis fargebruken styrer merksemda vår.
Finn du døme på den største lys-mørk-kontrasten med kulørte fargar: gul-lilla?