Njuike sisdollui
Geahččaladdan

Geahččaladdan: Guorahala iežat seallaid

Ráhkat mikroskohpapreparáhta epitelseallain mat bohtet du muođu siskkobealde, ja oahpasmuva ealleseallaid bajásráhkadusain ja siskkaldas struktuvrrain.
Govvakollaša mii čájeha mikroskohpa ja mikroskohpagova ovtta epitelseallas. Govva.
Njálbmeoali epitelseallaid mikroskohpagovva, oktan smávva baktearain. Govva: Tone Fredsvik Gregers, Tom Knudsen / CC BY-NC-SA 4.0

Ulbmil

Oahpasmuva ealleseallaid bajásráhkadusain ja siskkaldas struktuvrrain dan bokte go studeret iežat epitelseallaid. Dáin seallain ii leat álgoálggus ivdni, muhto mii lasihit ivdneávdnasa oažžun dihte buoret kontrástta.

Rusttegat

  • bumbolsákkit

  • objeaktaláse
  • gokčanláse
  • filttárbábir
  • 1 % metylenalit-luvus dahje láivuduvvon joda-luvus
  • goaikkanasmihttár
  • mikroskohpa

Bargovuohki

Ivdnekeahtes jorba seallat main váimmus oidno čielgasit ja cytoplasma lea eahpečielggas. Govva.
Ivdnekeahtes epitelseallaid mikroskohpagovva. Govva: Science Photo Library, NTB scanpix / CC BY-NC-SA 4.0
Ollu seallat main oidno ivdnejuvvon seallaváimmus čielgasit, oktan smávva čuoggáiguin mat leat baktearat. Mikroskohpagovva.
Njálbmeoali ivdnejuvvon epitelseallaid mikroskohpagovva oktan smávva baktearain. Govva: Science Photo Library / CC BY-NC 4.0

  1. Rábo bumbolsákkiin várrogasat siskkobealde muođu.

  2. Jorát bumbolsákkii objeaktaláse alde nu ahte njálbmeoali seallat sirdásit láseduolbadassii.

  3. Goaikal ovtta goaikkanasa ivdneluvvosa objeaktaláse ala ja govčča preparáhta gokčanlásiin.

  4. Geavat filttárbáhpira njammat eret liiggálaš ivnni.

  5. Iskka preparáhta mikroskohpas. Álgge unnimus stuoridemiin ja stuorit stuorideami go leat ožžon čielga gova.

  6. Cavgileapmi! Geavat čuovgaráiggi ja kondensora vai oainnát nu bienalaččat go vejolaš.

  7. Govve áinnas mobiilatelefovnnain okulára čađa.

Molssaevttolaš metoda:

Rábo várrogasat siskkobealde muođu bátnesoalluma duogábeliin. Fiero bátnesoallumiin ovtta goaikkanasa metylenaliha mii lea objeaktaláse alde. Govčča gokčanlásiin.

Bohtosat ja viidáseappot bargu

  1. Geahččal identifiseret iešguđet organaseallaid ja seallastruktuvrraid, ja bija namaid. Sáhtát geavahit govaid maid leat govven, ja bidjat daidda namaid, dahje ráhkadit sárgosa masa čálát.
  2. Makkár funkšuvnnat leat dain iešguđet organeallain ja seallastruktuvrrain? Čális moadde čoavddasáni juohke struktuvrii.
  3. Mii lea mihtilmas ealleseallain?
  4. Oidnet go buot struktuvrraid mat huksejit ovtta eallesealla? Vuođuš vástádusa.
  5. Válddat epitelseallaid hámi, ja meroštala daid sturrodaga. Millimehterbáhpira vehkiin sáhtát gávdnat sturrodaga dan oaidnoviidodagas mii dus lea mikroskohpas. Dát lea buorre veahkkeneavvu gávdnat sturrodaga seallas man geahčat.
  6. Njálbmeoalis eai leat dušše iežat seallat, muhto maiddái baktearaseallat. Gávnnat go baktearaid iežat preparáhtas? Válddat erohusa dan guovtti seallasortta stuorrodagas ja mo leaba olggosoaidnit.

Cavgileapmi!

Dán aktivitehta lea vuogas bargat oktanaga Geahččaladdan: Suokkar šaddoseallaid doaimmain, veardidan dihte ja ipmirdit erohusa dain iešguđet eukaryota seallain.

Guoskevaš sisdoallu