Lasswells hugseregel for kommunikasjon er eit nyttig verktøy når du skal analysere ein kommunikasjonsprosess. I 1948 formulerte kommunikasjonsforskaren Harold Lasswell den følgjande setninga for å forklare kommunikasjonsprosessen: «Kven seier kva, til kven, gjennom kva kanal og med kva verknad?»
Lasswells hugseregel kan seiast å vere ei enkel, munnleg framstilling av kommunikasjonsmodellen. I marknadskommunikasjon skjer det ei overføring av ein marknadsføringsbodskap frå ei verksemd til ein mottakar.
Nedanfor får du to døme på korleis vi kan bruke Lasswells hugseregel til å forklare ein kommunikasjonsprosess. Det eine ser på ein reklame for Lerum, mens det andre tek for seg ein informasjonskampanje for Statens vegvesen.
Kven – Lerum
seier kva – at produkta våre er laga av dei beste fruktene og bæra
til kven – målgruppa, dei som kjøper saft og syltetøy
i kva kanal – YouTube, reklamekanalar på TV, kinoreklame
med kva verknad – at det vil vere meir sannsynleg at målgruppa vel å kjøpe saft og syltetøy frå Lerum
Kven – Statens vegvesen
seier kva – at råkjøring er barnsleg
til kven – ungdom (gutar spesielt)
i kva kanal – YouTube
med kva verknad – riktige haldningar til bilkøyring og fart