Propagandakunst i Romarriket?
Ordforklaringar
- propaganda
- medviten manipulering av folks kjensler og tankar for å få dei til å meine eller gjere bestemde ting
- byste
- eit bilethoggararbeid av eit menneskehovud og øvste del av overkroppen (utan armar)
Kunst som vil formidle ei meining, ei politisk retning eller påverke folks tankegang på ein veldig direkte måte, kallar vi propagandakunst. Romersk kunst frå keisartida vart laga for å styrke posisjonen til keisaren og skape oppslutning om styret.
Del 1: Undersøk og diskuter
Finn tre døme på propagandakunst frå Romarriket. Her kan det lønne seg å bruke søkeorda "propaganda art" i kombinasjon med "the Roman Empire". Ver kritisk til kjeldene og dobbelsjekk at bileta du finn, kjem frå rett tidsepoke.
Prøv, saman med ein medelev, å finne ut korleis desse døma blei brukte, og kva keisaren ville oppnå.
Diskuter om det finst noka form for propandakunst i dagens samfunn?
Samanfatt det de fann ut, i klassen etterpå.
Del 2: Teikn ein studie av ei byste
Utstyr og teknikk
Foreslåtte reiskapar: gråblyant, kol eller fargekrit
Papirstorleik: A3 i ståande format
Teknikk: skravering
Du skal teikne ein studie av ein romersk byste. Set bysten på eit bord og klargjer han med ei lampe. Det er viktig å legge merke til bakgrunnen og lyssetjinga av bysten. Dette kan hjelpe deg til å lage ein god komposisjon og til å få fram djupneverknad i teikninga di.
Jobb med å finne ei god plassering av motivet på arket. Studer proporsjonane og teikn forma med lett oppteikning.
Bruk skravering for å skape valørar. Bruk lys- og skuggespel til å få fram volum og teksturen i materialet.
Du vel sjølv om du vil tilsetje fargar på studieteikninga di.
Kjelde
Skirbekk, S. (2020, 9. juli). Propaganda. I Store norske leksikon. https://snl.no/propaganda.
Relatert innhald
Nettside hos artsandculture.google.com