Hopp til innhald

Oppgåver og aktivitetar

Mandala

I denne oppgåva skal du lage ein mandala. Mandala betyr "dekorasjon i ein sirkel". Denne måten å teikne på blir gjerne brukt som meditasjon. For oss er det ei god øving i konsentrasjon og i å teikne ulike formelement.
Mandala teikna med fargeblyantar og penn på mørkeraud kartong. Illustrasjon.

Til læraren

Startoppgåve

Å lage mandalaer kan bli brukt som ein introduksjon til formelement. I starten av skuleåret kan elevane jobbe sjølvstendig med denne oppgåva, mens du som lærer vil kunne gjennomføre elevsamtalar.

Avgrens fargepaletten

Det kan vere lurt å gjere klar teikneark eller kartong i same format til alle på førehand. Her kan det vere fint å avgrense paletten på papira elevane teiknar på, slik at det blir ei harmonisk utstilling når mandalaene blir hengde opp saman.

Tre munkar lagar eit kunstverk av sand i ulike fargar. Foto.
Opne bilete i eit nytt vindauge
Ein mandala er eit kunstverk som skal symbolisere universet. I tibetansk buddhisme blir dei ofte laga i sand og blir øydelagde når dei er ferdige for å vise forgjengelegdommen til dei materielle tinga.
CC BY-NC
Bilete: Michel Gounot

Lag din eigen mandala

Utstyr

  • Teikneark eller kartong med kvadratisk form

  • Teikne- og fargeblyantar, penn eller tusjar

Kollasj av tre ulike mandalaer. Ein med kvite strekar på svart bakgrunn, ein med svarte strekar på kvit bakgrunn og ein med svarte og kvite strekar på brun bakgrunn. Illustrasjon.

Gjentaking av formelement

Eit kvadrat med stipla diagonallinjer. Midtpunktet er markert. Illustrasjon.
CC BY-SA
Bilete: Inger Gilje Sporaland

Les om formelement og lær deg fagorda.

Lag ein mandala ved å gjenta same formelement slik det er vist i instruksjonsfilmen under. Du skal bruke dei grunnleggande elementa punkt, linjer og flater og gjenta dei systematisk rundt senteret.

Bruk eit kvadratisk teikneark. Du finn midtpunktet der diagonalane kryssar kvarandre. Arbeid i sirkel ut frå dette punktet.

Viss du ønsker det, kan du prøve ut ein liten versjon før du startar på den store. Du vel om du vil starte med blyant, tusj eller penn.

Fargar

Du kan bruke kvit eller farga kartong eller teikneark. Bruk gjerne fargeblyantar eller tusjar til å dekorere mandalaen din med fargar.

Kollasj av tre ulike mandalaer. Illustrasjon.

Instruksjonsfilmar

Frihand

Det er ei god øving å teikne mandalaen på frihand. Instruksjonsfilmen under viser korleis du kan bygge opp ein mandala trinn for trinn.

CC BY-SA
Video: Siren Halvorsen

Bruk av hjelpelinjer

Viss du synest det er lettare å bruke hjelpelinjer til å bygge opp mandalaen, kan du bruke passar og linjal til å dele sirklar inn i åtte delar. Instruksjonsfilmen under viser deg korleis du kan bygge opp ein mandala ved bruk av hjelpelinjer.

CC BY-SA
Video: Siren Halvorsen

Utstilling

Lag ei felles utstilling av dei ferdige mandala-illustrasjonane. Bli einige om de vil skape eit lappeteppe, eller om de vil ha avstand mellom arbeida.

35 fargerike mandala-illustrasjonar utan avstand mellom dei er utstilte på ein vegg. Foto.
Opne bilete i eit nytt vindauge
Korleis synest du det fungerer å avgrense paletten slik at fargane på kartongen blir gjentekne?
CC BY-SA
Bilete: Inger Gilje Sporaland
Kjelde

Saers, C. & Dæhli, K. (2019, 15. august). Buddhisme –retningar. NDLA. https://ndla.no/19907

CC BY-SASkrive av Liv Inger Espedal og Inger Gilje Sporaland.
Sist fagleg oppdatert 05.05.2024

Læringsressursar

Formuttrykk