Finpussing

• Les teksten din høgt. Då oppdagar du fort om det er noko som skurrar eller øydelegg leseflyten.
• Bruker du mange munnlege småord som “jo, liksom, kanskje, mogleg”? Då bør du fjerne dei. I ein skriftleg analyse skal språket vere så fagleg og presist som mogleg – eit for munnleg preg på teksten vil svekke truverdet.

Mange elevar slit med samansette ord, altså ord som består av to delar som skal skrivast saman, ikkje stykkast opp. For mange såkalla særskrivings feil øydelegg lese flyten i teksten – ikkje sant?

For å finne svar på om eit ord skal skrivast i to ord eller saman, kan det vere lurt å ta ein tydeleg pause mellom orda når du les dei høgt. Høyrest det kunstig ut med ein pause, er sannsynet stort for at ordet skal skrivast i eitt. Les gjennom teksten din og ta pausar – kanskje oppdagar du nokon særskrivingsfeil?

Den grafiske framstillinga er også viktig for inntrykket lesaren får av teksten din. Sjå derfor på han med eit kritisk blikk, eller vis han til ein annan elev.

• Ser teksten din ryddig ut?
• Har du brukt skrifttype, skriftstorleik og linjeavstand som oppgåva ber om? På eksamen er det Times New Roman, skriftstorleiken 12 punkt og linjeavstand 1,5 som er standard.
• Har du hugsa å gi overskrifta di ein litt større skriftstorleik?
• Kva med markering av nytt avsnitt? Eit nytt avsnitt skal markerast med ei heil blank linje.