Småfe er sau og geit. Saueproduksjon finn vi over nesten heile landet, mens det er mest geiter på Vestlandet og i Nordland og Troms. Vi har mange ulike sauerasar i Noreg, men den vanlegaste geiterasen er norsk mjølkegeit. Saueproduksjon gir oss ull og kjøtt. Av geitene får vi mjølk, kjøtt og skinn.

Geiteproduksjonen i Noreg går i hovudsak føre seg frå norsk mjølkegeit, og mesteparten av mjølka går til produksjon av ost. Skinn og ull er andre produkt frå geit. Det er òg noko kjøttproduksjon, men i avgrensa omfang. I tillegg til mjølkegeiter er det ein del ammegeiter av ulike rasar.

Geiter er drøvtyggarar, og vi må passe på at mikroorganismane i vomma får det dei treng for å kunne fungere som dei skal. Surfôr og høy er det viktigaste fôret gjennom vinteren, om sommaren hentar dei fleste geitene fôret sitt på inn- eller utmarksbeite. Dei får òg kraftfôr og mineral ved behov.