Arduino: bruk av skjold
I Arduino-verda bruker vi ordet skjold (engelsk: shields) om tilleggsmodular som kan koplast til arduino-mikrokontrollerar slik at dei får utvida funksjonalitet, til dømes tilgang til ulike sensorar, aktuatorar, kommunikasjonseiningar og andre tilkoplingar.
Hovudformålet med skjolda er å gi utviklarar høve til å legge til spesifikke funksjonar i prosjekt utan at dei treng å kople til og programmere fleire individuelle komponentar. Dei kan berre plugge på eit skjold.
Arduino-skjold har fleire fordelar:
Enkel tilkopling: Skjolda er utforma for å passe direkte på toppen av arduino-bordet. Det er ikkje noko behov for komplisert kabling eller lodding.
Plattformkompatibilitet: Skjolda er utvikla for å vere kompatible med arduino-standardstørrelsen og pinout-konfigurasjonen. Det sikrar saumlaus integrasjon og utviding av Arduino-prosjekt.
Modulær tilnærming: Skjolda mogleggjer ei modulær tilnærming til prosjekt. Vi kan legge til eller fjerne funksjonalitet etter behov ved å legge til eller fjerne ulike skjoldmodular.
Tidssparande: Ved å bruke skjold slepp vi å designe og bygge kretskort frå botnen av. Dette sparer tid og ressursar, spesielt for dei som ikkje har mykje erfaring med elektronikk.
Det finst mange ulike typar skjold tilgjengeleg for arduinoer. Her er nokre døme.
Sensorskjold
Desse skjolda gir tilgang til ulike sensorar som måler temperatur, fukt, lysstyrke, rørsle og mykje anna. Dei gjer det enkelt å integrere sensorteknologi i prosjekt.
Motorskjold
Desse skjolda er spesielt utforma for å styre motorar, anten det er likestraumsmotorar, servomotorer eller steppar-motorar. Dei gir grensesnitt og drivarkretsar som forenklar motorstyring.
Kommunikasjonsskjold
Desse skjolda gir arduino-mikrokontrolleren høve til å kommunisere med andre einingar og system via ulike kommunikasjons-protokollar, til dømes wifi, Bluetooth, Ethernet og GSM.
LCD-skjold
Desse skjolda har ein integrert LCD-skjerm som gjer det enkelt å vise informasjon og resultat av målingar på ein brukarvennleg måte.