Kva er Arduino?
Arduino er ei open kjeldekode-plattform som består av ein serie mikrokontrollerar og eit programvareutviklingsmiljø som blir brukt til å utvikle og programmere elektroniske prosjekt.
Arduino-mikrokontrollerane er rimelege, enkle å bruke og passar for både nybegynnarar og erfarne elektronikkentusiastar.
Ein Arduino-mikrokontroller består av ein mikroprosessor, digitale og analoge inngangar og utgangar og dessutan ein USB-port for programmering og kommunikasjon med datamaskina. Han støttar også tilkopling til ulike sensorar, motorar og andre elektroniske komponentar.
Mikrokontrollerar som bruker Arduino
Det finst ei rekke ulike Arduino-mikrokontrollerar, til dømes Arduino UNO, Arduino Nano, Arduino Mega og Arduino Leonardo. Modellane har ulike spesifikasjonar, men dei deler alle den same grunnleggande funksjonaliteten.
Fordi Arduino nyttar ein såkalla open kjeldekode, leverer også andre produsentar mikrokontrollerar som kan programmerast på same måte som ein Arduino-kontroller.
Programvara til Arduino
Arduino-programvara, kjend som Arduino IDE (Integrated Development Environment), er eit brukarvennleg programmeringsverktøy som gjer det mogleg å skrive og laste opp programvara til Arduino-mikrokontrolleren. Programmeringsspråket som blir brukt i Arduino IDE, er basert på C/C++, men Arduino har også eit eige sett med funksjonar og fleire bibliotek som forenklar programmeringsprosessen.
Bruksområde
Arduino er eit utviklingsverktøy som kan brukast i mange ulike elektroniske prosjekt, til dømes robotprogrammering, interaktive installasjonar, automatiserte system og sensorbaserte einingar. Plattforma har ein stor og aktiv fellesskapsbase der brukarar deler prosjekt og kodedøme og hjelper kvarandre.
Arduino er eit populært verktøy fordi det er enkelt, fleksibelt og lett tilgjengeleg. Det blir brukt av lærarar, elevar og studentar og av hobbyutviklarar og profesjonelle utviklarar over heile verda.
