Visualisering i blomsterdekoratørfaget
Skisser
Visualisering vil som regel drive idéar vidare. Det kan hjelpe deg til å sjå andre sider ved ein idé enn dei du klarer å tenke ut eller beskrive.
Små, raske skisser er ein god måte å utvikle idéar innanfor blomsterdekoratørfaget på. Til dømes når du planlegg eit blomsterarbeid for eit spesielt høve, som brudearbeid eller eit blomstersmykke, vil det vere nyttig å teikne små raske skisser. Etter kvart som du lagar fleire og fleire skisser, trer former og mønster fram, og idéen blir tydelegare.
Ved større dekorarbeid innandørs eller utandørs bør det leggast ein plan for arbeidet. Scenedekor eller ein bryllaupsportal er døme på arbeid der du bør lage enkle skisser når du planlegg.
Fargepalett
Blomsterdekoratørar jobbar ut frå dei fargane som plantematerialet har. Når du skal velje fargar, må du ta omsyn til tilgang på materiale i sesong, høvet blomstrane skal brukast i, og ønska til kunden.
Lag fargepalettar med utgangspunkt i plantemateriala. Det kan vere lurt å finne inspirasjon til nye kombinasjonar frå fargar i bilete som fangar akkurat det uttrykket du ønsker. Det kan vere foto frå naturen, men òg andre inspirasjonsbilete, som fargar i eit interiør eller i eit måleri.
I butikk set vi ofte fargar saman raskt ved å halde dei ulike blomstrane mot kvarandre og sjå kva som passar. Dersom du skal bestille blomstrar, kan du bruke bilete av blomstrane for å sjå om dei harmonerer. Erfaring gjer at du blir tryggare på kva som passar saman, og du vil stadig finne nye kombinasjonar av materiale.
Moodboard eller stemningsplansje
Eit moodboard, eller ein stemningsplansje, er ein kollasj av visuelle uttrykk som blir brukte i kreative prosessar for å skape eit stemningsrom rundt ein idé. Poenget er å visualisere eit uttrykk for arbeidet ditt. Eit moodboard kan lagast fysisk eller digitalt.
Foto
Etter kvart som du opparbeider deg erfaring gjennom arbeid med ulike fargekombinasjonar, materiale og uttrykk i blomsterarbeida dine, er det lurt å fotografere dei ferdige resultata. Du kan gjerne også ta bilete av arbeidet undervegs. På denne måten får du mange bilete å hente inspirasjon frå, og som du kan bruke i dialog med kunden.
Mange blomsterdekoratørar bruker ulike biletdelingsplattformer eller sosiale medium for å marknadsføre eiga bedrift, men òg for å samle og dele inspirasjon.
Arbeidsteikning
Av og til er det behov for å lage ei arbeidsteikning for å visualisere og planlegge eit produkt. Ei arbeidsteikning skal vise form på arbeidet, plassering og samansetjing av ulike materiale.
Arbeidsteikningar skal alltid teiknast i målestokk. Forholdet 1:2 passar ofte for bukettar og dekorasjonar dersom du teiknar på A3-ark.
Det skal vere rett tal av kvart plantemateriale og lett å sjå plasseringa av materiala. Tenk deg at ein annan skal kunne utføre arbeidet ut frå teikninga di. Du kan forenkle formene så lenge vi kan lese ut av teikninga kva art det er. Du teiknar kvart enkelt materiale og skriv botanisk namn og antal. Det skal vere tydeleg kva art og farge du skal ha.
Digital arbeidsteikning
Du kan lage arbeidsteikning i valfri teknikk. Fargeblyantar, akvarellfargar i kombinasjon med kontur i penn og tusj er nok dei vanlegaste teknikkane å bruke.
Det finst mange ulike digitale teikneprogram eller program for visualisering. På arbeidsteikninga under er det brukt foto som er traca. Då kan du flytte rundt på materiala, kopiere opp ønskt antal og leike deg med komposisjonen. Du kan òg bruke digitalt teiknebrett og teikne dei ulike plantemateriala.
