Form handlar om korleis gjenstandane rundt oss ser ut. Å designe blir ofte forklart med å formgi. Når vi behandlar materiale, til dømes frå naturen, gir vi dei ei ny form. Både forma og fargane påverkar korleis vi opplever eit produkt. God formforståing er viktig i alle handverksyrke.

Alle former uttrykker noko, og opplevinga av former kan vekke kjensler og er med på å skape ulike stemningar. Derfor må du under heile prosessen frå idé til ferdig produkt tenke gjennom korleis du bruker former. Formelementa du vel, bør passe til produktet og til brukergruppa.