Reklamasjonsrett
Som seljar må du vere klar over reklamasjonsretten til kunden. Reklamasjon er kort fortalt "eit varsel" frå kunden til seljaren om at det er noko feil med eit kjøpt produkt. Det kan til dømes vere ein produksjonsfeil eller ein skade på produktet som har oppstått under transport. Ein vaskemaskin lek, ein mobiltelefon skrur seg av, eller ein vasskokar slår seg ikkje på. Det er ikkje alltid at feila blir synlege før kunden begynner å bruke produktet. I slike tilfelle kan kunden nytte seg av reklamasjonsretten.
Reklamasjonsfrist
Dersom det er noko gale med produktet du har selt, må kunden bruke reklamasjonsretten innan rimeleg tid. Reklamasjonsfristen avheng av kor lenge produktet er meint å vare. Ein vaskemaskin har til dømes lengre reklamasjonsfrist enn ei jakke. Hovudregelen er at den relative reklamasjonsfristen er innan to månader etter at feilen er oppdaga, og den absolutte fristen er innan to eller fem år avhengig av kor lenge produktet er meint å vare.
Døme på produkt med fem års reklamasjonsfrist er
bilar
mobiltelefonar
kvitevarer (til dømes vaskemaskin, oppvaskmaskin og kjøleskap)
brunevarer (til dømes tv, radio og stereoanlegg)
Døme på produkt med to års reklamasjonsfrist er
joggesko
hårfønar
elektroniske leiker
Seljaren må handtere reklamasjonen
Om ein kunde kjem til deg for å reklamere på eit produkt, må du handtere det. Du kan ikkje be kunden om å kontakte produsenten eller leverandøren og fikse det sjølv. Den jobben er det du som seljar som må gjere. Men om kunden ventar for lenge med å klage, kan han eller ho få avslag på reklamasjonen.
Kva krav kan kunden stille?
Dersom kunden har oppdaga feil eller manglar ved produktet sitt og reklamerer innan rimeleg tid, må du vite kva kunden har krav på. Det kan vere
reparasjon eller utbetring av produktet
nytt eller tilsvarande produkt
avslag i prisen
pengane tilbake og heving av kjøpet
Feil ved produkt som oppstår før det er gått seks månader, blir rekna som fabrikkfeil, med mindre du kan bevise at kunden er ansvarleg for feilen. Ved fabrikkfeil må du tilby reparasjon eller eit nytt produkt. Som seljar kan du prøve å rette opp i mangelen to gonger før kunden har krav på eit nytt produkt, så lenge opprettinga av mangelen ikkje er til vesentleg ulempe for kunden.
Om reparasjonen av eit produkt tek meir enn ei veke, må du tilby kunden eit låneprodukt. Om ein kunde leverer inn mobiltelefonen sin til reparasjon, har vedkomande krav på ein lånetelefon med dei same funksjonane som den som blei levert inn.
Dersom produktet ikkje lèt seg reparere, må du gi kunden pengane tilbake eller tilby eit nytt produkt. Viser det seg at kunden sjølv er ansvarleg for feilen, til dømes ved at kunden har brukt produktet på galen måte, kan du krevje at kunden betaler for reparasjonen.