Åehpiedehtemem vuarjasjidh

Saemien-faagesne ih edtjh ajve digkiedimmine meatan årrodh jïh håalemh jïh åehpiedehtemh hööltedh. Datne edtjh aaj ulmien vööste barkedh juktie ahkedh væjkalåbpoe sjïdtedh njaalmeldh tsiehkine. Jïh ij ajve dïhte – datne edtjh aaj maehtedh «goltelidh, vuarjasjidh jïh bïhkeden bïevnesh bååstede vedtedh mubpiej njaalmeldh åehpiedehtiemidie»!

Vihkeles datne krïevenasside damth mej mietie dijjieh learohkh vuarjasjamme sjidtieh, juktie ajve dellie datne buektehth tjïelke jïh nuhteligs bïevnesh bååstede vedtedh dov mubpie-learoehkidie. Krïevenassh aaj hijven viehkie dutnjien gosse edtjh akten njaalmeldh åehpiedehtiemasse ryöjredidh, juktie dellie daajrah maam lohkehtæjja datneste veanhtede.

Maehtebe bïevnesh bååstede vedtedh joekehtslaakan. Videove bijjielisnie dutnjien aktem vuekiem vadta jieniebistie, jïh mijjieh gegkiestibie dïhte dutnjien skraejriem vadta barkojne nïerhkedh goh positijve laejhtije, dovne aavojne jïh itjmiesvoetine!

Gyhtjelassh videovasse

1. Mij sæjhta jiehtedh prosessesne barkedh njaalmeldh åehpiedehtieminie?
2. Mij lea aevhkie daejnie vuekine, lohkehtæjja Inger Holtanen mietie?
3. Mij akte åvtese-bïevnese?
4. Inger Holtan dïejvesem vekstpunkt nuhtjie. Buerkesth mij akte vekstpunkt lea.
5. Andrean håalemen mænngan klaasse åådtje responsem vedtedh. Mïsse doh mubpieh learohkh edtjieh responsem vedtedh?
6. Man åvteste Andrea lyjhkoe satne naemhtie vuarjasjamme sjædta?
7. Mij lea sinsitnie-vuarjasjimmie?
8. Man åvteste learohkh lyjhkoeh response-goerem nuhtjedh?
9. Mah aevhkieh vuarjasjimmie-barkoe vadta response-dåehkine, lohkehtæjjan mietie?
10. Maam datne barkoe-vuekiej bïjre tuhtjh filmesne? Datne dejtie aarebi nuhtjeme?

Darjoeh aktem raeriestimmiem akten vuarjasjimmie-goerese njaalmeldh åehpiedehtiemasse.

Gaaltije

Ööhpehtimmiedirektoraate (2019). Learoesoejkesje saemien voestesgïeline (SFS01-05). https://www.udir.no/lk20/sfs01-05?lang=sma Veedtjeme: 15.09.20