Subjektijve, men buerkiestamme
Jis datne jienebh filme-ållermaehtemh aktede jïh seamma filmeste lohkh, sïjhth vuejnedh ållermaehtijh filmem joekehtslaakan vuarjasjieh, jïh dah ovmessie bielieh filmeste lahtestieh. Numhtie edtja årrodh, dan åvteste mijjieh filmide vuarjasjibie jïh toelhkestibie jïjtjene daajroej jïh dååjrehtimmiej mietie. Mijjen aaj joekehts smaahke. Dan åvteste akte ållermaehtije tjuara lohkijidie tjïelkestidh man åvteste filmem vuarjesje naemhtie goh dorje.
Krïevenassh
Mah krïevenassh akte ållermaehtije byöroe nuhtjedh juktie filmen kvaliteetem vuarjasjidh? Ållermaehtije byöroe jiehtedh mejtie filme maam akt orre sjugnede sjangeren sisnjelen, jallh mejtie dïhte lea jearsoes, åehpies mieriej sisnjeli. Dïhte filmem vuajna ektiedimmesne dej jeatjah filmigujmie mejtie filme-bïhkedæjja aarebi dorjeme. Lissine lohkije tjuara daejredh mah våajnoes væhtah mah leah filmesne: Mij vuesiehtimmien gaavhtan sjïere dramatiseradimmine? Guktie dorjehtæjjah spealadieh? Jïh mah viehkie-vierhtieh filmesne åtnasuvvieh? Gosse filmem vuarjasjibie edtjebe sjangerasse jïh ulmie-dåahkan vuartasjidh. Jis akte ållermaehtije ij filmh lyjhkh mestie bælla, ij sïjhth jiehtedh ållermaehtije maahta gaajhkh filmh ”leekedidh” daan sjangeren sisnjelen. Dellie buerebe dagkeres vuarjasjimmiem akten måbpan vedtedh. Faage-dïejvesh jallh aarke-biejjien gïele?
Hammoe jïh gïele ållermaehtiemisnie tjuerieh sjïehtedamme årrodh ulmie-dåahkan. Jis mijjieh gaajhke-såarhts vuartasjæjjide tjaelebe, byörebe våårege årrodh faagegïeline. Gïele maahta aaj såemiesmearan sjïehtedamme årrodh filmen sisvegasse. Baaltelen meedije vihkeles: Mijjieh jeatjah veanhtadimmieh utnebe Filme-pollisen ållermaehtiemidie NRK P3-programmesne goh akten tjaaleldh teekstese seamma sjangerisnie aktene plaeresne.
Tjiehpieslaakan tjaaleme jïh sjollehte
Ållermaehteme akte journalistiske teekste. Dïhte edtja viehkiehtidh aktem plaeriem, raadijove-programmem jallh nedte-sijjiem doekedh. Dan åvteste ij edtjh ajve bievnedh: teekste tjuara aaj lohkiji ïedtjem feengkedh jïh dam steeredh. Akte hijven gïele jïh akte persovneles gïele leah dan åvteste daerpies!