Tjaaleldh govlesadteme lea saemien lohkedh jïh saemien tjaeledh. Datne dov tjaaleldh govlesadtemem evtiesovvh gosse ovmessie sjangerigujmie barkh. Jis edtja hijvenlaakan tjaaleldh govlesadtedh, dle daerpies maehtedh maereles tjaalegh darjodh mah leah dåastoejasse sjïehtedamme.

Gosse lohkeminie ih maehtieh tjaeliejinie govlesadtedh. Ih maehtieh gihtjedh jis ih guarkah maam tjaaleme jïh ih maehtieh govlesadtedh dejnie mejnie dov tjaalegem låhka. Dan gaavhtan vihkeles ussjedidh guktie tjaalah juktie lohkije edtja dov tjaalegem guarkedh.