Film og filmklipp
Vassbakkels
Vassbakkels er eit lett og luftig bakverk som vi kan variere på mange måtar, med ulike former, storleikar og fyll. Dei kan fyllast med søte kremar eller eit salt fyll.
Vassbakkels med mokkakrem. Bilete: Magnar Kirknes / CC BY-NC-SA 4.0
Vassbakkels blir laga av ein forvella masse. Forvella massar består som oftast av vatn, fast feitt, mjøl og egg. Å forvelle betyr å gi eit lett oppkok. Vi kan nytte denne deigen til å lage til dømes waleskringle, eclairs og profiteroles.
Framgangsmåte
- Kok opp vatn og smør.
- Tilsett mjøl under omrøring til massen slepper kjelen.
- Avkjøl massen litt.
- Rør egga forsiktig inn, eitt og eitt om gongen.
- Ha massen i ein sprøytepose og sprøyt ut ønskt form på ei smurd steikjeplate.
- Steik ved 200 °C i 20–25 minutt. Større bakverk som kringle treng lengre steikjetid. Opne ikkje omnsdøra undervegs, då fell kakene lett saman!
- Avkjøl kakene og fyll med ønskt fyll.
Andre variantar
Det er òg mogleg å nytte mjølk som væske og tilsetje sukker/vaniljesukker i massen. Han får då meir smak, men blir mjukare. Den spanske retten churros er ein forvella masse som blir laga på same måte som vassbakkels, men som blir fritert i staden for å bli steikt i omnen.
Churros. Bilete: Imagebroker/barbara Boensch / CC BY-NC-SA 4.0
I denne videoen får du sjå korleis du lagar ein vassbakkelsdeig, og du får sett døme på ulike måtar å forme massen på.
Video: Mintra AS / NDLA / CC BY-SA 4.0