Informasjon om oppgåva
I denne oppgåva får kvar elev tildelt eit tema og ein meny. Under finn de nokre forslag. Avhengig av klassestorleiken kan to elevar få same oppgåve, eller det kan skrivast fleire tema og menyar.
Kvar elev skal dekke og pynte slik at temaet enkelt kan kjennast igjen ved å sjå på bordet. Tema og fargar kan òg brukast i kuvertmenyen. Elevane vel sjølve om personen som skal bli feira, har spesielle interesser som skal komme fram gjennom dekoren, til dømes idrett, friluftsliv, musikk.
Det er viktig at elevane på førehand har gått gjennom skriving av kuvertmeny og korleis setje drikke til maten.
| Bryllaup | Hummarsuppe Okse indrefilet, ovnssteikte grønsaker, peparsaus, fløytegratinerte poteter Crème brûlée |
|---|---|
Gullbryllaup | Krema blomkålsuppe, brød og smør Heilsteikt svin indrefilet, steikte grønsaker, gulrotpuré, peparsaus, steikte potetbåtar Tiramisu |
| Konfirmasjon 1 | Krema fiskesuppe, brød og smør Elgsteik, bakte rotgrønsaker, krema skogsopp, tyttebærsyltetøy, viltsaus, kokte poteter Tarte tatin |
| Konfirmasjon 2 | Kald laks, salat, urterømme Lammesteik, steikte rotgrønsaker, raudvinssaus, steikte småpoteter Heimelaga is med friske bær |
| 50-årsdag | Reinsdyrcarpaccio Omnsbakt kveite, grønsaker, sandefjordsmør, kokte poteter Karamellpudding |
| Haustfest | Elgcarpaccio, sylta betar Rosasteikt rypebryst, steikt sopp, tyttebærkokte pærer, krema rypesaus, omnsbakte poteter Moltemoussekake med bjørnebær |
| Nyttårfest | Skogsoppsuppe Elgbiff, brokkoli, gulrøter, blomkål, viltsaus, rognebærgelé, omnsbakte poteter Sjokolademousse, sitronsorbé |
| Julemeny | Røykt laks, sennepssaus, toast Ribbe, medisterkake, raudkål, brun saus, kokte poteter Riskrem med kirsebærsaus |
Oppgåver
Ut frå meny og tema skal du
setje vinar og alkoholfrie alternativ til menyen
skrive kuvertmeny
beskrive kva serveringsteknikk du vil bruke på dei ulike rettane, og kvifor
grunngi om det er forskjell i bruk av serveringsteknikk om menyen skal serverast i eit selskap til 8 personar, 40 personar eller 100 personar, og eventuelt kvifor
dekke og pynte bordet til fire personar. Eventuelle ekstra glas og utstyr skal setjast klart på servicebord.
Evaluer arbeidet ditt
Kor fornøgd vart du med oppdekkinga av bordet?
Synest du bordet speglar temaet du fekk?
Kva kunne du ha eventuelt ha gjort betre?
Tips til lærar!
Oppgåva kan enkelt bli tilpassa og endra til føresetnadene og nivåa til eleven. Ein kan ta bort enkelte delar som å setje drikke til maten eller skrive kuvertmeny, eller berre dekke etter den gitte menyen og utelate det andre.