Film og filmklipp

Emosjonell førstehjelp

Ein akutt skade eller sjukdom kan utløyse sterke emosjonelle reaksjonar av både psykisk og fysisk art for dei som er involverte. Det er viktig at du som skal gi førstehjelp, er kjend med desse reaksjonane og veit at det er heilt normalt. På den måten kan du gi best mogleg hjelp.

Orsak, ein feil oppstod ved lasting av video. Prøv å laste inn sida på nytt.

Flight-fight-freeze-respons

I svært stressande situasjonar, som ved ulykker og alvorleg sjukdom, er det vanleg for alle involverte å reagere med ulik grad av spontan redsle på den faren som har oppstått. Dette er ein normal reaksjon for at vi skal overvinne situasjonen.

Denne reaksjonen blir kalla ein flight-fight-freeze-respons, og det kan opplevast i ulik grad.

Flight – du reagerer med ei angstprega flukt.
Fait – du reagerer med å kjempe, reaksjonen kan òg vere prega av sinne.
Freeze – du reagerer med å bli fullstendig låst (frose).

Moglege kroppslege reaksjonar hos hjelpar

Det er ikkje unormalt viss du opplever ei form for frykt i møtet med ein skadd eller sjuk person som du må hjelpe. Kroppen din kan òg reagere med ein flight-fight-freeze-reaksjon. Det skuldast at nervesystemet ditt er i alarmberedskap, og du får mykje stresshormon i kroppen. Det vil derfor ikkje vere unaturleg dersom du opplever at følgjande skjer:

Du blir veldig redd.
Pulsen aukar og du får hjartebank.
Du blir svært tørr i munnen.
Du føler deg skjelven og svimmel.
Du får vanskar med å tenkje klart.