Kva er hydraulikk?

Animasjonen viser korleis ein biljekk er konstruert og fungerer. Du bruker ei lita kraft på eit handtak, du pressar då ned eit stempel i ein sylinder og fortrengjer væska på eit lite område (areal) som gir stor kraft på eit mykje større område (areal).

Oljehydraulikk er ei kraftform som er mykje brukt i industrien. Hydraulikk er mykje brukt til verktøymaskinar, robotteknikk, anleggsmaskinar og flyteknikk. Den største fordelen med hydraulikk er at mykje kraft kan overførast ved hjelp av relativt små komponentar. Hydraulikken har gode akselerasjonseigenskapar og toler harde miljø. Symbol og skjema er teikna i samsvar med Norsk Standard, NS-ISO 1219-1:2006.

Forskjellen mellom pneumatikk og hydraulikk er ikkje så veldig stor. Hovudforskjellane er at olje, som er drivmediet i hydraulikk, ikkje lèt seg komprimere som luft, som er drivmediet i pneumatikk. Dette gjer at det ikkje blir svingingar i systema, som vi ser kan oppstå med store mottrykk i pneumatikken. Systema blir derfor òg meir presise. Vi kan i tillegg bruke vesentleg høgare trykk enn i pneumatikken, noko som fører til meir kraft. Mens vi i pneumatiske system sender returlufta ut som eksos, må vi i hydrauliske system bruke returslangar som leier olja tilbake til tanken.