Korte fakta om sikkerheitsbransjen
I første kvartal av 2020 var det ifølgje Statistisk sentralbyrå (SSB) 7763 personar som oppgav å vere vektar av yrke.
Delen kvinner var 26 prosent, mot 47 prosent totalt i alle yrke.
69 prosent av vektarane var under 40 år, mot eit snitt på 46 prosent for alle yrke.
Bransjeforeininga Sikkerhet og Beredskap består av 305 verksemder i 54 konsern med 9,2 milliardar kroner i omsetning og 8947 årsverk samla sett. Det viser rapporten Tall og Trender 2020 frå NHO.
Fire hovudtenester
Vaktverksemder tilbyr fire hovudtenester.
Stasjonært vakthald
Dette er vakthald for ein bestemt kunde, som vektaren jobbar for i heile tenesteperioden. Døme er resepsjonsteneste, vakt i døra og vakthald på byggjeprosjekt.
Mobilt vakthald
Dette er ei vektarteneste der vektaren varetek sikkerheitsbehova til fleire kundar i eit større område. Tenesta går i hovudsak føre seg på natt og i helger.
Publikumsretta vakthald
Publikumsretta vakthald er ei vektarteneste der vektaren jobbar direkte med kundane til oppdragsgivaren. Døme er vakthald på kjøpesenter og i butikkar og områdevakthald i by- og bumiljø. Publikumsretta vakthald kan òg vere arrangementsvakthald og vakthald på utestader og skjenkestader.
Svinnkontroll
Svinnkontroll er tenester som skal bidra til å redusere svinn hos kundar, inkludert å avdekkje underslag internt hos kundane og å stanse og førebyggje butikktjuveri.
Kilde
NHO. Tall og Trender 2020: Sikkerhet og beredskap.
https://www.nhosh.no/tall-og-fakta/tall-og-trender/tall-og-trender-2020/sikkerhetogberedskap/