Sikkerheitsbehov i samfunnet
Gjennom tenestene dei utfører, gjer vaktverksemdsbransjen ein viktig jobb for å trygge samfunnet. NHO-rapporten Tall og trender: Sikkerhet og beredskap for høvesvis 2020 og 2021 inkluderer statistikk over innsatsen som vektarane gjer i samfunnet. Her har vi plukka ut nokre nøkkeltal:
Vakthaldstenester | 2019 | 2020 |
|---|---|---|
Sikkerheitsassistanse (talet på gonger) | 42 500 | 33 434 |
Meldingar på vegner av kundar (talet på gonger) | 12 141 | 9 270 |
Førstehjelp (talet på personar) | 1 818 | 1 431 |
Redda liv (talet på personar) | 267 | 120 |
Tenk over
Kvifor blei tala lågare i 2020, trur du?
Sikkerheitsassistanse
Vektarar gir sikkerheitsassistanse i situasjonar som blir melde inn. Det kan vere utrykking til heis- og sikkerheitsalarmar eller bistand til helsepersonell. Det kan òg vere trusselsituasjonar ved til dømes offentlege kontor, serveringsstader og butikkar.
Meldingar
Vektarar melder saker på vegner av kundar. Desse sakene dreier seg i stor grad om hærverk og innbrot.
Førstehjelp og livredning
Førstehjelp og livreddande innsats på offentlege stader er ei viktig oppgåve for vektarar. Vektarar tek leiinga eller hjelper til i situasjonar som dreier seg om alt frå blokkerte luftvegar til hjartestans og overdosar.