Heimebasert omsorg blir gitt til personar som på grunn av sjukdom, funksjonshemming eller andre årsaker er heilt avhengige av hjelp, og som er ute av stand til å klare alle eller deler av gjeremåla i dagleglivet sjølve. Dette blir gitt sjølv om dei bur saman med andre personar som er friske, og det gjeld òg barn som treng betydeleg meir bistand og omsorg enn det som er vanleg for jamaldringar. Det er kommunen som vedtek kva tiltak som skal tilbydast til den enkelte.
Målet med heimebasert omsorg er at personane skal klare å bu i sin eigen heim, sjølv om dei har behov for hjelp til ulike gjeremål. Dei skal oppleve at dei kan vere trygge i sin eigen heim og bli mest mogleg sjølvhjelpte og få ein best mogleg kvardag. Helsetenesta blir ytt heime hos personen eller med utgangspunkt i heimen. Når det er formålstenleg, kan tenesta gå føre seg utanfor heimen, til dømes utandørs eller på eit treningssenter.
Varierte arbeidsoppgåver
Tenestene kjem an på ressursane og behova til brukarane, og arbeidet er derfor variert. Heimebasert omsorg fokuserer på evna til meistring, tilrettelegging og medverknad i eigen kvardag.
Det er viktig at du er klar over at du kjem heim til ein person som treng hjelp og støtte. Behova til personen og retten til sjølvbestemming og medbestemming er sentralt i omsorgsarbeidet. Personen som får tenesta, skal få høve til å medverke ved utforminga av tenestetilbodet.
Du må vere høfleg og vise respekt for den som får hjelp. Når du utøver omsorg, må du vise at du bryr deg om det mennesket du skal hjelpe. Du må jobbe for å få til god og trygg kommunikasjon som kan bidra til gode relasjonar og eit godt samspel mellom deg og brukaren. Personen som får hjelp, skal kjenne seg trygg saman med deg. For at du skal gjere ein god jobb, må du reflektere over din eigen praksis og ulike etiske dilemma du møter i kvardagen.
Arbeidsoppgåver kan mellom anna vere
hjelp og/eller opplæring til eigenomsorg og personleg stell, av- og påkleding, dusj, munn- og tannpleie, barbering og liknande
praktisk bistand og/eller opplæring til å handle inn og lage mat
praktisk bistand og/eller opplæring til å gjennomføre vanleg husarbeid som husvask, vask av klede, sengeskift og liknande
pleie og omsorg til sengeliggande og alvorleg sjuke
hjelp, støtte og rettleiing til fysisk aktivitet og opptrening
å delta, støtte og motivere til sosial aktivitet og samvær
tilsynsbesøk til dei som er mykje åleine, for å sjå om dei har det bra, og å vere ein samtalepartnar
å følge personen til lege, spesialisthelsetenesta, tannlege og liknande
hjelp og rettleiing til tekniske hjelpemiddel
samarbeid med andre instansar, til dømes fysioterapeut, ergoterapeut eller sosionomtenesta
Utfordringar til deg
Kven kan få heimebasert omsorg?
Kva arbeidsoppgåver kan du få i heimebasert omsorg?
Kvifor er gode kommunikasjonsevner ein viktig eigenskap i heimebasert omsorg?
Korleis tenker du det er å jobbe og hjelpe andre i deira eigen heim?
Kjelde
Helsedirektoratet. (2017). Veileder for saksbehandling – Tjenester etter helse- og omsorgstjenesteloven §§ 3-2 første ledd nr. 6, 3-6 og 3-8 (IS-2442). https://www.helsedirektoratet.no/veiledere/saksbehandling-av-tjenester-etter-helse-og-omsorgstjenesteloven/veileder%20for%20saksbehandling%20av%20tjenester%20etter%20helse-%20og%20omsorgstjenesteloven.PDF/