Vedlikehald av MIG-/MAG-utstyr
Kvifor er vedlikehald viktig?
Vedlikehald av MIG- og MAG-sveiseapparat er avgjerande for å sikre optimal yting og sikkerheit. Regelmessig vedlikehald forhindrar slitasje og feil som kan føre til ujamn sveising, defektar i sveisen og til slutt strukturell svikt.
Det bidreg òg til å forlenge levetida til sveisemaskina, redusere kostnader til reparasjonar og minimere risikoen for arbeidsulykker. Ved å sikre rette innstillingar og reingjering kan du òg forbetre kvaliteten på sveisen og effektiviteten i produksjonen.
Film om bruk av sveisetong (1:18)
Vedlikehaldspunkt
Gå inn i dei ulike punkta i biletet under for å sjå kva vedlikehaldsoppgåver vi bør gjere på eit MIG-/MAG-sveiseapparat. Innhaldet er tilgjengeleg i tekstformat lenger nede på sida.
Vedlikehaldspunkta i tekstformat
1. Elektrodetråden (ved byte av spole)
Når du byter tråd på apparatet, klipper du elektrodetråden rett i enden og gradar han med ei fil slik at han ikkje skadar trådleiaren.
2. Inngangsdysa
Kontroller at inngangsdysa er så nær matehjulet som mogleg, og at ho ikkje er skadd.
3. Matehjulet
Gjer matehjulet reint regelmessig og byt det ut når det er slite. Sporet i matehjulet må ha rett dimensjon i forhold til elektrodetråden og vere rett sentrert i forhold til trådleiardysa.
4. Trykkhjulet
Du må ikkje stramme trykkhjulet for hardt. Du har passe matetrykk dersom du greier å stoppe ekektrodetrådmatinga med to fingrar. For stort matetrykk kan føre til at tråden krøllar seg opp mellom matehjulet og trådleiardysa.
5. Trådleiaren
Støv og smuss stoppar trådleiaren gradvis. Derfor er det viktig at du gjer han rein regelmessig med trykkluft og reinsevæske.
6. Isolasjonshylsa
Isolasjonshylsa skal vere uskadd og fri for sprut, elles kan det bli overslag.
7. Gassrøyret
Gassrøyret skal alltid stikke ut litt framfor kontaktrøyret for at kontaktrøyret ikkje skal komme borti arbeidsstykket og brenne seg fast.
8. Kontaktrøyret
Kontaktrøyret er viktig. Det leier straumen fram til elektrodetråden. Kontaktrøyret er heile tida utsett for stor slitasje, og med for stor slitasje får du ujamn straumleiing, mykje sprut og ujamn sveiseoverflate.
9. Elektrodetråden
Klipp av elektrodetråden 12–15 mm utanfor kontaktrøyret når du startar sveisinga. Bruk avbitar eller spesialtilpassa sveisetong.
10. Trådleiardysa
Du må alltid ha minst mogleg avstand mellom matehjulet og trådleiardysa for å unngå at tråden krøllar seg.
11. Gassen
Lite gass gir porer, for mykje gass gir turbulens, dårleg innsmelting og høg sveis. Sjekk alltid gassmengde opp mot sveiseprosedyre eller databladet til elektrodetråden.
12. Gassrøyret
Du må reingjere gassrøyret regelmessig og fjerne avleiringane på innsida. Dersom avleiringane blir for store, kan du få lysbogeoverslag. For å motverke avleiringar er det ein fordel å bruke pasta.
Sjølve sveisepistolen er samansett av fleire delar. I biletet under ser du dei viktigaste delane:
Vedlikehaldsplan
For å ha god oversikt over når vedlikehald er gjennomført på sveisemaskina, er det lurt å ha eit skjema som beskriv kva som skal gjerast, kor ofte vedlikehaldet skal gjennomførast, og eventuelt kven som har gjennomført vedlikehaldet.
Døme på vedlikehaldsplan:
Vedlikehaldspunkt | Frekvens | Utført av | Dato | Kommentar |
|---|---|---|---|---|
| Klipp elektrodetråden ved skifte av spole | Ved kvart skifte | Grad med fil | ||
| Kontroller inngangsdysa | Før kvar bruk | Nær matehjulet, ingen skadar | ||
| Reingjer matehjulet | Kvar veke | Byt ut ved slitasje | ||
| Kontroller trykkhjulet | Kvar veke | Juster matetrykk | ||
| Reingjer trådleiaren | Kvar veke | Bruk trykkluft og reinsevæske | ||
| Kontroller isolasjonshylsa | Før kvar bruk | Ingen sprut, uskadd | ||
| Kontroller gassrøyret | Kvar veke | Utstikk framfor kontaktrøyret | ||
| Kontroller kontaktrøyret | Før kvar bruk | Sjå etter slitasje | ||
| Klipp elektrodetråden | Før kvar sveising | 12–15 mm utanfor kontaktrøyret | ||
| Kontroller avstand mellom matehjul og trådleiardysa | Før kvar bruk | Minst mogleg avstand | ||
| Sjekk gassmengde | Før kvar sveising | Juster opp mot prosedyre | ||
| Reingjer gassrøyret | Kvar veke | Fjern avleiringar |
Skjema til nedlasting
Viktig!
Desse vedlikehaldsråda er generelle, og du må sjå på brukarmanualen for akkurat di maskin for å setje opp ein korrekt vedlikehaldsplan.