HMS ved sveising

Arbeidsmiljø og personleg verneutstyr

Arbeidsmiljø handlar om alt som påverkar oss mens vi jobbar, både fysisk og psykisk. Eit godt arbeidsmiljø sørger for at du kan gjere ein god jobb samtidig som du trivst. Arbeidsmiljølova krev at arbeidsplassar skal vere trygge for deg og helsa di, både fysisk og mentalt.

Alle bedrifter har plikt til å jobbe systematisk med helse, miljø og sikkerheit (HMS). HMS er som sikringsnettet til bedrifta – det handlar om å førebygge ulykker og sørge for eit sunt arbeidsmiljø.

Kva er systematisk HMS-arbeid?

HMS betyr å følge reglar og retningslinjer for sikkerheit og kvalitet. Det kan gjelde alt frå korleis lokalet er innreidd til korleis arbeidet er tilrettelagt. Leiarar har ansvar for å sikre at desse reglane blir følgde, i samarbeid med dei tilsette. Målet er å oppdage og fikse problem før dei fører til ulykker eller helseproblem.

Systematisk HMS-arbeid ved sveising er viktig for å sikre trygge arbeidsforhold, både for sveisaren og for dei som er i nærleiken. HMS-arbeid (helse, miljø og sikkerheit) går ut på at verksemdene aktivt og systematisk følger opp reglar og retningslinjer for å vareta både helsa til dei tilsette, miljøet rundt dei og sikkerheita deira på arbeidsplassen.

Eit viktig verktøy i dette arbeidet er internkontrollsystemet. Det skal sørge for at bedrifta har full oversikt over risikoar, og at ho lagar rutinar for å førebygge skadar og ulykker. Ved sveising betyr det blant anna å kartlegge farar som brann, giftig røyk og giftige gassar, stråling og fysiske belastningar. Internkontrollsystemet dokumenterer alle tiltak, rutinar og ansvarsområde, og det skal vere lett for alle tilsette å forstå.

Viktige element i systematisk HMS-arbeid ved sveising:

Kartlegging av risiko

identifisere potensielle farar ved sveising, som brannfare, skadelege gassar, stråling og ergonomiske utfordringar

Førebyggingstiltak

utvikle konkrete tiltak for å redusere risikoen, som brannvakter ved varme arbeid, bruk av punktavsug for å fjerne sveiserøyk, og nok personleg verneutstyr

Opplæring og trening

sørge for at tilsette er godt informerte og har nødvendig kompetanse til å handtere risikoar på arbeidsplassen (det inkluderer kurs i varme arbeid, førstehjelp og brannsløkking)

Overvaking og oppfølging

kontrollere sveiseutstyr, ventilasjonssystem og sikkerheitsprosedyrar regelmessig, og gå gjennom internkontrollsystemet jamleg for å tilpasse nye metodar eller endringar i arbeidsmiljøet

Farane ved sveising

Sveising kan vere risikofylt, så det er viktig å vite om farane. Nokre av dei vanlegaste risikoane er brann- og eksplosjonsfare, giftig røyk, giftige gassar og stråling.

Brann- og eksplosjonsfare

Gneistar og varme frå sveising kan starte brannar, spesielt utanfor verkstaden, som ved bygningsarbeid. Før du begynner å sveise, må du sjekke om det er brennbart materiale i nærleiken, og ha brannsløkkingsutstyr klart.

I mange tilfelle er det krav om kurs i varme arbeid, og ei brannvakt som overvakar arbeidet.

Gassar og røyk

Gassveising og bogesveising produserer farlege gassar og røyk. God ventilasjon og punktavsug er viktig for å verne helsa di. I nokre tilfelle treng du òg ei maske som tilfører rein luft.

Sveiserøyk kan føre til alvorlege helseproblem, som metallfeber og lungesjukdommar, så vern er viktig.

Stråling

Ved lysbogesveising kan ultrafiolett stråling (UV-stråling) skade auga dine. Det er ikkje nok med solbriller. Du må bruke godkjende vernebriller eller sveisemaske for å beskytte deg.

Hugs at sveiselys òg kan skade huda, så bruk alltid vern som hanskar og heildekkande klede.

Sikkerheit på arbeidsplassen

Det er viktig å skjerme sveiseplassen for å beskytte andre som jobbar i nærleiken. På faste arbeidsplassar blir det ofte brukt varmebestandig forheng og skjermar. På meir midlertidige plassar kan vi bruke mindre, flyttbare skjermar for å beskytte andre mot stråling og gneistar.

Arbeidsstilling og ergonomi

Å sveise kan vere fysisk krevjande. Står du bøygd over lang tid eller sveiser over hovudet, kan du få rygg- og skulderplager. Hugs å byte arbeidsstilling ofte. Ta pausar, og bruk rett teknikk når du løfter tunge ting. Det reduserer slitasje på kroppen og gjer at du kan jobbe effektivt over lengre tid.

Stoffkartotek og tryggingsdatablad

Alle bedrifter som handterer farlege stoff, må ha eit stoffkartotek. Det er ei oversikt over helsefarlege stoff som blir brukte i bedrifta. Kartoteket kan gi viktig informasjon viss nokon blir utsette for desse stoffa ved uhell.

Stoffkartoteket inneheld òg sikkerheitsdatablad som viser kva stoffa kan gjere med kroppen, og korleis vi skal handtere dei trygt.