Servering av sider

Serveringstemperatur

Visste du at serveringstemperaturen har mykje å seie for korleis smakane i drikken kjem fram? Rett temperatur er avgjerande for å oppnå den beste smaksopplevinga. For sider påverkar temperaturen både aroma, smak og munnkjensle.

Vi bør servere sider ved rett temperatur for å framheve smaken og friskleiken.

• musserande sider: 6–10 gradar for å halde på boblene, bevare friskleiken og syra

• issider, engelsk og fransk tradisjonell sider: 10–12 gradar, altså litt varmare enn musserande for å framheve komplekse aromaer

Viss sideren blir servert for kald, vil smakane bli dempa, og aromaene vil ikkje komme godt fram. Viss sideren derimot er for varm, vil boblene forsvinne raskare, og drikken kan opplevast som flat og tung. Serveringstemperaturen påverkar faktisk heile drikkeopplevinga: varm sider, lunken øl eller for kald raudvin kan resultere i ei skuffande smaksoppleving.

Glas

Kva type glas vi serverer sider i, varierer mellom ulike land og kulturar. Norsk moderne sider blir ofte serverte i vinglas, mens engelsk sider ofte blir helt i pintglas. Fransk og spansk sider blir tradisjonelt servert i glas som kan minne om mjølkeglas.

Servering

Ikkje berre varierer glasa sideren blir servert i, men òg korleis vi skjenker han.

Norsk, fransk og engelsk sider blir skjenkt roleg i glaset slik som vin, for å bevare boblene. I Spania, derimot, er skjenkinga ei kunstform: Her blir sideren helt frå høgde for å tilføre luft og skape bobler. Denne serveringsmetoden kan ha stor innverknad på opplevinga av sideren. Serveringsmåten påverkar altså opplevinga av sideren i glaset.

Prøv ut i praksis

Er du klar for å teste korleis serveringstemperaturen påverkar lukt, smak og bobler i sider?

Slik gjer du:

1. Finn fram reine vinglas utan lukt.

2. Hell opp alkoholfri sider med ulike temperaturar:

• kald sider (rett frå kjøleskapet, ca. 4 gradar)

• temperert sider (som har fått temperert seg til ca. 8–10 gradar)

• romtemperert sider (som har stått i romtemperatur ein periode, ca. 20 gradar)

Ved å samanlikne desse tre temperaturane kan du oppleve korleis kvar temperatur påverkar smaken og aromaene i sideren.

Diskuter med dei andre i klassen korleis temperatur påverkar opplevinga av sider.

Lykke til med eksperimenteringa!

Bruk gjerne skjemaet under til å fylle inn dei ulike observasjonane de gjer under smakinga.

• Skjema til bruk ved samanlikning av serveringstemperatur(DOCX)