Næringsinnhald i egg

Egg i ernæringa

Eit norsk gjennomsnittsegg veg 63 g. Av dette er om lag 22 g plomme, 33 g kvite og 8 g skal. Plomma har både høgare energi- og næringsinnhald enn kviten.

Næringsinnhaldet i eggekviten og eggeplomma kan du studere i matvaretabellen. Der ser du at eggeplomma inneheld utruleg mange næringsstoff!

Vi et i gjennomsnitt eit halvt egg kvar om dagen. Nokon et meir – andre mindre. Egg gir oss ei lang rekke næringsstoff; ja, dei aller fleste stoffa menneskekroppen treng er til stades i egget.

Kva egget har å seie i kosthaldet

Egg er ein ganske liten del av det samla kosthaldet, trass i at det er ei allsidig matvare. Vi et som nemnt om lag eit halvt egg per person per dag, og det utgjer lite av alt vi et i løpet av dagen. For eldre menneske som har låg forbrenning gjer frukostegget det mogeleg å få i seg ein porsjon vitamin utan altfor mange kaloriar på kjøpet. Vi seier at egg har høg næringstettleik fordi det inneheld mykje vitamin og mineral i høve til energi (kcal/kJ).

Vitamin

A-, B-, D-, E- og K-vitamin. Det einaste vitaminet som ikkje finst i egg er vitamin C. Av B-vitamin finst det heile 8 ulike og alle er til stades i egget. Vitamin D er ekstra vanskeleg å få frå kosthaldet elles, så egget sitt bidrag tel ekstra her! Det er ikkje så rart at egget blir kalla "Naturen sin eigen vitaminpille"! NB: Må ikkje svelgast heile!

Mineral og sporstoff

Jern, kalsium, natrium, kalium, magnesium, fosfor, sink og selen. Jern tel litt ekstra i egg, fordi kvinner lett får for lite jern frå kosthaldet elles.

EGG-proteinet – det beste i verda for kroppen!

Proteina i matvarer har svært ulik verdi for kroppen, og proteinet i egg er det beste. Det samla proteinet i egg liknar mest på kroppen sitt eige protein. Derfor seier vi at egget har den beste proteinkvalitet for menneskekroppen.

Egg har mykje umetta feittsyrer

På same måte som kylling og kalkun inneheld også egg ein stor del umetta feittsyrer; og er dermed sunnare, til dømes hardkokt som pålegg, enn til dømes kvitost eller spekepølse. Egget gir òg færre kaloriar.