Kvalitetskontroll og sortering
Fjørfe kom etter måten seint med blant husdyra våre i Noreg. Tamt fjørfe ser ikkje ut til å ha vore noko særleg utbreidd før i vikingetida. I dag har vi om lag 3,5 millionar høner og er sjølvforsynte med egg. Når vi snakkar om egg her i Noreg, snakkar vi heilt sjølvsagt om hønseegg.
Høna legg det første egget sitt når ho er om lag 19 veker gammal. Ho verp nesten eitt egg kvar dag, nemleg 6 egg på 7 dagar. Levealderen til ei høne er om lag 70 veker. Eggproduksjonen har då begynt å avta, og hønene blir slakta og selde som høns.
Eit gjennomsnittsegg
Eit egg veg i gjennomsnitt 63 gram. Dette egget består vidare av
om lag 57 % eggekvite
om lag 33 % eggeplomme
om lag 10 % skal
Noregs største hønseegg
Delen plomme og kvite endrar seg litt etter kor store egga er. Dei aller største egga har ein større del plomme i høve til kvite, og med små egg er det omvendt. Det er om lag like mykje eggeskal på kvart egg. Det vil seie at store egg har tynnare skal enn små egg. Det største egget vi kjenner til her i Noreg vart lagt i Høyjord i 1993. Egget vog 210 gram!
Kvalitetskontroll og sortering av egg
Når egga kjem inn til eggpakkeriet, har bonden allereie sortert ut klink-egg (brest i skalet), deformerte egg (ruglete skal o.l.) og ureine egg (skitent skal). Desse egga går berre til industri.
Vidare blir egga sorterte på eggpakkeriet ved gjennomlysing. I eit lite, mørkt rom sit det ein kontrollør og sjekkar egga som kjem på band forbi kontrolløren. Under egga er det sterkt lys som gjer at ein ser egginnhaldet gjennom skalet. Eventuelle blodflekkar, "kjøttflekkar", store luftrom, tyntflytande kvite eller brest i skalet blir då oppdaga, og egga blir sorterte ut. Resten av egga blir klassifiserte som A-egg.
Desse egga deler ein så inn i fire ulike storleikar etter vekt:
S (small) 45–53 g
- M (medium) 53–63 g
L (large) 63–73 g
XL (ekstra large) 73–78 g
Trygge, norske egg
Norske egg er av topp kvalitet i verdssamanheng når det gjeld å vere reine og helsemessig trygge. I dei fleste andre land er situasjonen ein heilt annan. Større delar av både egg og fjørfekjøtt er infiserte av salmonellabakteriar. I enkelte land blir forbrukarane åtvara mot å ete egg og eggerettar som ikkje er varmebehandla tilstrekkeleg.
ISO-sertifisering av eggpakkeri
Dei fleste norske eggpakkeria er ISO-sertifiserte. Dette sikrar at alle i kjeda frå bonden og til butikk/bedrift følgjer oppsette prosedyrar over korleis egget skal behandlast for å oppnå den kvaliteten ein er ute etter.
Norske egg er like gode og like trygge å ete i fleire månader etter at dei har «gått ut på dato», berre du har egga i kjøleskap.