Oppgåve

Skap flyt mellom avsnitta

God flyt i tekst får du når det er flyt mellom setningane, og når samanhengen mellom avsnitta i teksten er fin. Her får du tips om korleis du kan lage gode overgangar mellom avsnitt.

Ei bok ligg. Opp frå denne stikk ei hand som tar ein figur i handa. I tillegg er det ei rekke snakkebobler med setningskoplarar som "Eit anna døme er" og "I tillegg". Illustrasjon. — Når du brukar setningskoplarar for å lage god språkflyt, er det som om du leiar lesaren gjennom teksten din.

Bind saman avsnitta

Eit triks for å skape fin flyt i teksten din, er å binde saman avsnitta.

Bruk førstesetninga i neste avsnitt til dette.
Bruk gjerne setningskoplingar.

Eksempeltekst

Sjå korleis starten på avsnitt to blir brukt til å skape flyt mellom avsnitta:

Eit viktig argument for å bu i byen, er at her har ein tallause valmoglegheiter. Dette gjeld både fritidstilbod og menneske. I dei fleste byar er det nemleg slik at du kan kan velje og vrake i ulike hobbyar. Dersom du liker å danse ballett, besøkjer du den lokale danseskulen. Er du meir interessert i å spele saksofon, melder du deg inn i eit av korpsa i byen. På denne danseskulen og i korpset finn du likesinna, altså menneske som er interesserte i det same som deg. Men bur du på bygda er du kanskje den einaste guten du veit om som har ein draum om å bli ballettstjerne. Då kan det vere slik at nettopp denne kjensla kan få deg til å bli ganske einsam. På denne måten er byen det beste alternativet når du skal bestemme deg for kvar du vil bu.

På bygda, derimot, er ikkje valmoglegheitene like store som i byen. I staden må du tilpasse deg alle dei ulike menneska som finst der. Det underlege er at nettopp dette kan skape meir toleranse.

Temasetningar og markering av avstand

Temasetninga er den første setninga i eit avsnitt. Ho fortel kva avsnittet skal handle om, men temasetninga er òg viktig når du skal lage flyt mellom avsnitta. Måten du formulerer temasetningane på kan hjelpe deg til å framstille innhaldet i teksten din meir objektivt. Gjer oppgåva under for å lære meir om dette:

Del 1: Gode temasetningar?

Til høgre ser du det som er temasetningane i hovuddelen til ein fagartikkel om ungdom og press.

Dette er fine og klare temasetningar. Det kjem dessutan godt fram at skrivaren ser saka frå ulike sider.

Men ser du likevel at å starte avsnitta med desse temasetningane vil sjå litt "rart" ut?

Diskuter med sidemannen

Skulen pressar norske ungdomar så mykje at dei bryt saman.
Norske ungdomar er for sytete og innser ikkje at skule og lekser er heilt nødvendig.
Utsjånad-fokuset er altfor stort og fører til dårleg psykisk helse.
Altfor mange norske ungdomar er overvektige og burde skjøne at trening er viktig.

Å drøfte elegant

Når de drøftar, skal de prøve å skrive sakleg og halde eigen person utanfor. Det de likevel må passe dykk for, er å bli så opptekne av å skrive upersonleg, at de står igjen med ein tekst der det kan verke som om de har éi meining i eitt avsnitt, og ei heilt anna meining i avsnittet etter.

Ein kunne nesten tru at to personar med heilt motsett syn har skrive annakvart avsnitt i teksten.

To personer som diskuterer. Illustrasjon. — I ei drøfting skal du sjå saka frå ulike sider. Teksten din må likevel bindast saman på ein måte som gjer at det ikkje verkar som om to ulike personar har skrive annakvart avsnitt.

Del 2: Sy saman temasetningane

Sy saman temasetningane under slik at det ikkje lenger verkar som om to ulike personar har skrive dei.

Målet er at de skal vise avstand til stoffet.

Diskuter med sidemannen og skriv ned forslaga dykkar.

Setningar

Skulen pressar norske ungdomar så mykje at dei bryt saman.
Norske ungdomar er for sytete og innser ikkje at skule og lekser er heilt nødvendig.
Utsjånad-fokuset er altfor stort og fører til dårleg psykisk helse.
Altfor mange norske ungdomar er overvektige og burde skjøne at trening er viktig.
Ungdom i dag har det vanskelegare enn nokosinne på grunn av sosiale medium.
Unge menneske som er fødde i det rikaste landet i verda, skjønar ikkje kor heldige dei er.

Løysingsforslag

Temasetningane under viser avstand til stoffet. Men setningane verkar ikkje lenger som om dei er skrivne av to ulike personar.

I tillegg blir teksten meir nyansert fordi dei ikkje presenterer påstanden som om han var ei allmenngyldig sanning.

Mange meiner at skulen pressar norske ungdomar så mykje at dei bryt saman.
Eit anna synspunkt er at norske ungdomar er for sytete og ikkje innser at skule og lekser er heilt nødvendig.
Somme hevdar også at utsjånad-fokuset er altfor stort og fører til dårleg psykisk helse.
På den andre sida er altfor mange norske ungdomar overvektige og burde skjøne at trening er viktig.
Eit argument for at ungdommen i dag har det vanskelegare enn nokosinne, er sosiale medium.
Likevel meiner somme at unge menneske som er fødde i det rikaste landet i verda, ikkje skjønar kor heldige dei er.

Skrivetips
Avsnittsoppbygging	Flyt	Avstand til stoffet
Skriv korte og presise temasetningar. Skriv kommentarsetningar med konkrete døme og tilvising til artiklane du har lese. Skriv sistesetningar som er oppsummerande og viser til problemstillinga.	Bruk setningskoplingar til å skape flyt mellom setningane. Tenk nøye gjennom korleis du skaper gode overgangar mellom avsnitta.	Unngå subjektive formuleringar av typen «eg meiner/eg synest». Start avsnitta med ord og fraser som viser avstand til stoffet.