Lag film om berekraftig mobilforbruk

Mange reklamefilmar har som formål å få oss til å kjøpe noko nytt og forbruke meir. No får du utfordringa om å lage ein film som skal gjere det motsette.

Oppgåve

Lag ein haldningsskapande film som er retta mot ungdom i alderen 16–25 år. Formålet med filmen er å få mottakarane til å ta smarte og berekraftige val når det gjeld mobiltelefonar.

Del 1: Forarbeid

Diskuter og set ned nokre argument på kvart punkt:

Kvifor er det ikkje berekraftig å halde fram med det forbruket vi har av mobiltelefonar i dag? Sjå på til dømes miljøbelastningar, ressursknappleik og barnearbeid.
Korleis kan vi redusere belastninga på miljøet?
Kva for løysningar finst for å sikre rettferdig lønn og gode arbeidsføresetnader for arbeidarar i mobilproduksjonen?

Hugs å skrive ned kjeldene de bruker for å finne desse argumenta. Dei skal de setje inn på slutten av filmen.

Del 2: Lag dreiebok

Du bør ha ein god plan for korleis filmen skal sjå ut. Planlegg korleis du kan overtyde mottakaren til å ta dei gode og berekraftige vala.

Kva argument av dei du skreiv ned i del 1 vil du bruke i filmen?
Korleis kan du bruke bilete, tekst og lyd til å understreke argumenta dine?
Lag ei dreiebok (storyboard) som beskriv korleis filmen skal sjå ut.
Tips! Bruk gjerne pinnedokker som "skodespelarar".

Lær korleis du kan lage ei dreiebok i denne artikkelen frå Medie- og informasjonskunnskap: Storyboard (dreiebok).

Slutt på ikkje-tilgjengeleg innhald.

Presentasjonen over gjengitt som tekst og bilete

Bruk pinnedokker i filmproduksjon

Tre elevar lagar stop-motion-film med pinnedokker. To personar held papirutklipte figurar festa til pinnar framfor ein utskriven bakgrunn med skog og hogstfelt, medan ein tredje person filmer scena med ein mobiltelefon mot ei grøn tavle. Foto.

Når du skal lage ein film eller ei digital forteljing, kan det vere ein idé å la pinnedokker spele ulike roller.

For å få passande miljø, skriv ut bilete og bruk desse som bakgrunn.

Framgangsmåte

Skriv ut biletet og lim på kartong.
Klipp ut figurane du vil bruke.
Fest personane til grillspyd (eller pinne) med teip.

Du kan sjølvsagt også teikne dine eigne figurar.

På bileta under vil du finne fleire figurar du kan bruke direkte eller la deg inspirere av.

Persongalleri med figurar knytte til handel og butikk. Illustrasjonen viser mellom anna kundar med handleposar og handlevogn, ein butikkmedarbeidar ved kassa, ein person med ei kasse frukt og grønsaker, ein tilsett ved ein grønsaksdisk og ein butikktilsett som held eit betalingskort. Illustrasjon. — Figurar som kan bli brukt som rollefigurar i forteljingar om handel og service.

Persongalleri med figurar knytte til energi og naturressursar. Illustrasjonen viser mellom anna personar som arbeider med olje, skogbruk, planlegging, miljø og energiproduksjon. Det er òg figurar med trillebår og plantar, motorsag, anleggsmaskin, solcellepanel og skogbrann. Illustrasjon. — Figurar som kan bli brukt som rollefigurar i forteljingar om energi, naturressursar og berekraft.

Persongalleri med figurar knytte til bioenergi og fornybar energi. Illustrasjonen viser mellom anna personar som arbeider med forsking, miljø, energiproduksjon og transport. Det er òg figurar med laboratorieutstyr og plantar, biodrivstoff, solcellepanel og ein bil som fyller drivstoff. Illustrasjon. — Figurar som kan bli brukt som rollefigurar i forteljingar om bioenergi, energiproduksjon og berekraft.

Persongalleri med figurar knytte til miljø og berekraft. Illustrasjonen viser mellom anna personar som resirkulerer avfall, plantar og vatnar tre, arbeider med solenergi, bruker elbil og utfører anleggsarbeid. Det er òg figurar med turutstyr og naturomgivnader. Illustrasjon. — Figurar som kan bli brukt som rollefigurar i forteljingar om miljø, naturvern og berekraft.

Del 3: Lag filmen

Bruk gjerne mobiltelefonen til å lage filmen. Du kan også bruke stillbilete.
Set saman i eit redigeringsprogram du kjenner. Dei fleste elevar har tilgang til appen "Bilder" på skule-PC-en sin.
På slutten av filmen skal det inn ei kjeldeliste og ein sluttplakat.
I kjeldelista fører du opp kjeldene bak argumenta du har brukt i filmen.
På sluttplakaten krediterer du dei som har laga innhald du bruker, til dømes bilete og musikk.

Vurdering

Du har laga ein film med høg måloppnåing når filmen

gir mottakarane informasjon om korleis dei kan ta smarte og berekraftige val når det gjeld mobiltelefonar
overtyder mottakaren ved hjelp av relevante og haldbare argument
har bilete, tekst og lyd som understrekar argumenta
oppgir pålitelege kjelder
krediterer opphavspersonar til bilete, tekst og musikk som er brukt