Korleis lage gode avsnitt i fagartiklar?

Skriv hovuddelen

Når du har gjennomført både idémyldringa, utforskinga og førskrivinga til ein fagartikkel, er du klar til å skrive hovuddelen. Har du allereie gjennomført desse delane, skal du sitje igjen med seks temasetningar som skal vere førstesetninga i avsnitta i hovuddelen din.

Oppgåve

Del 1: Skriv eit avsnitt saman

No skal vi jakte etter det perfekte avsnittet. Jobb gjerne i grupper på tre. Etter å ha gått gjennom presentasjonen under og gjort oppgåvene i denne, skal de sitje igjen med eit avsnitt de kan bruke i teksten dykkar.

Oppgåva føreset at de allereie har laga temasetningar, som vist i forrige steg i læringsstien.

Slik går de fram

1. Vel ut temasetninga til det argumentet de meiner er det viktigaste for at ungdom har for mykje press. For hugs: Du skal alltid skrive om det viktigaste først.

2. Sjå gjennom presentasjonen under.

3. Skriv eit avsnitt saman der de følgjer tretrinns-modellen presentasjonen viser.

Del 2: Diskuter teksten

Ein av dykk les avsnittet høgt for dei andre. Diskuter om de bør gjere endringar på språk eller innhald.

Del 3: Del med medelevar

Alle gruppene viser sitt avsnitt for resten av klassen. Gi kvarandre tilbakemelding på kva som er bra, og kva som kan forbetrast i jakta på det perfekte avsnittet.

Kanskje kan de til og med kåre ein vinnar? Kven har laga det beste avsnittet? Grunngi!