Patos

Korleis vekke kjensler?

Du kjenner kanskje til reklameuttrykket "fordi du fortener det". Ei slik formulering vekker kanskje ei kjensle av at vi må kunne unne oss litt luksus i kvardagen, samtidig som det uttrykker at "du er spesiell". Klarer du å vekke bestemte kjensler hos publikum, kan det vere med på å halde på tilhøyrarane si interesse.

Ein tale utan kjensler vil vere ein kjedeleg tale. Då er det ikkje lett å overtyde. I tillegg kan kjensler påverke mottakarane si vurdering av saka, og det motiverer til handling. Vi kan skremme eller vekke avsky med negative kjensler, eller lokke med positive kjensler.

Når du i ein tale skal overtyde ved å vekke kjensler hos publikum, bør du vise at også du har denne kjensla. Om du skal få nokon til å bli opprørt over ei bestemt sak, må du vise at du er like opprørt.

Du kan også velje å fortelje om personar, ting eller situasjonar som vekker den bestemte kjensla du vil ha fram. I presentasjonar kan du bruke bilete, film eller lydopptak, eller gi detaljerte, levande skildringar.