Fagstoff

Kva er ein fagartikkel?

I ein fagartikkel skal du skrive om eit tema. Du skal bruke fakta, sjå på ulike sider av ei sak og skrive presist. Her skal du lære meir om kva ein fagartikkel er.

Fire elevar sit ved pultar og jobbar med skulearbeid. To les bøker og to skriv på pc. Foto. — Ein fagartikkel handlar om ei sak. Det er lurt å lese om saka og diskutere med andre før du skriv.

Kva er ein fagartikkel?

Fagartikkelen er den vanlegaste sjangeren du møter når du skal skrive tekstar i skulen, både i norsk og i andre fag. Når du skriv ein fagartikkel, skal du utforske eit tema.

Bilete av ein skrivemal. Illustrasjon. — Ein fagartikkel har ei overskrift (1), ei innleiing (2), ein hovuddel (3) og ei avslutning (4).

I ein fagartikkel viser du at du kan tenke kritisk og reflektere over ulike sider ved temaet. Teksten har ei innleiing, ein hovuddel med fleire avsnitt og ei avslutning.

Språket i fagartikkelen

Språket skal vere nøytralt, utan for mange personlege meiningar. Målet er å informere lesaren, ikkje å overtyde eller underhalde. Ein god fagartikkel grunngir med kunnskap, ikkje kjensler.

Bruk kjelder

Ein god måte å grunngi meiningane dine på er å bruke kjelder. Når du viser til fakta frå gode kjelder, blir det du skriv, meir truverdig enn om du berre skriv: "Eg trur at ...".

Hugs at kjeldene du bruker, må vere til å stole på. Du må altså vere kritisk og velje kjelder som gir rett og sann informasjon.

Gå vidare i læringsstien for å lese eit døme på ein god fagartikkel.