Sølvets imperier

Episode 1 (lengde 58:30)

Episode 2 (lengde 58:30)

Episode 3 (lengde 58:11)

Om serien

Sølvets imperier er ein dokumentarserie i tre delar som viser korleis ei politisk avgjerd i Kina i 1571 sette i gang ei av dei første globaliseringsbølgene i verda, nemleg sølvhandelen. Sølv frå fjella i Sør-Amerika vart frakta over havet, og i byte fekk verda tilgang til te, porselen, silke og nye marknader. Serien viser korleis pengar, makt og handel kopla dei ulike kontinenta saman lenge før moderne global økonomi var allment kjend.

Serien følger Kinas "sølvalder" gjennom tre epokar.

I episode 1 følger vi den ville reisa sølvet gjer frå spanske gruver til keiserriket Kina, via nye handelsruter, opprør og den første Chinatown. Handelen blomstrar, rikdommen fløymer, men balansen er skjør, og det som startar ein gullalder, kan òg velte eit dynasti.

Historia tek av når te, sølv og stormakter krasjar. Episode 2 byr på luksus, handel og veksande spenningar – britane tørstar etter te, men Kina vil berre ha sølv. Løysinga er opium. Ein eksplosiv konflikt driv verda mot krig, og resultatet endrar historia: Kina blir knekt, Hongkong fell, og eit nytt kapittel i global maktkamp startar.

Skjebnen snur igjen når Kina blir pressa og audmjuka og reiser seg på nytt. Episode 3 følger opiumskrigane, brende palass og eit imperium på randa, men òg modernisering, Shanghai som verdsmetropol og at sølve blir brukt i industrien. Dette er eit drama om nedgang, comeback og ein nasjon som igjen tek plass i sentrum av verdsøkonomien.

Tematikken i serien

Sølv er det historiske limet i serien Sølvets imperier, som tek for seg korleis nettopp sølv sette i gang ein global handel som dreiv fram store historiske maktskifte i verda, og korleis økonomi, kultur og politikk på tvers av kontinenta forma verda slik vi kjenner ho i dag.

Serien viser korleis det enorme behovet Kina hadde for sølv, vart motoren for ein stor fase innanfor globaliseringa, og kva konsekvensar dette fekk for både store imperium, vanlege menneske, kultur og økonomiske system.

Korleis serien er eigna i skulen

Sølvets imperier eignar seg for bruk i vidaregåande skule fordi han viser tydelege samanhengar mellom økonomi, politikk og krig, med sølv som både valuta, kunst og maktsymbol. Serien gir innsikt i korleis statleg kontroll, handel og maktmisbruk har fått store konsekvensar for befolkningar over tid.

Serien kan særlig knytast til den overordna delen i læreplanen om kritisk tenking, kulturarv, tradisjonar og menneskerettar.

Gjennom konkrete historiske døme gir serien rom for refleksjon og kulturforståing, og han eignar seg spesielt godt i faga historie, samfunnskunnskap og programfag som politikk og menneskerettar, økonomi og leiing og dessutan kunst-, design- og mediefag.