Berekraftig mobilbruk?

Utrydding av dyr

Mange dyr i verda er i ferd med å døy ut. Men veit du at gamle mobiltelefonar kan vere med på å redde nokon av dei? I takt med auka gruvedrift får mellom anna gorillaene mindre leveområde og blir i større grad eit lettare bytte for ulovleg jakt. For å forhindre denne utviklinga kan attvinning av gamle mobiltelefonar vere ein del av løysinga.

Arbeidsforhold til gruvearbeidarar

Den demokratiske republikken Kongo er eit land som er berykta for gruvedrifta si og utvinninga av mineral og metall til produksjon av mobiltelefonar. I filmen ovanfor blir arbeidsforholda til gruvearbeidarar problematiserte.

Lag ei marknadsundersøking

Jobb i grupper, og lag ei marknadsundersøking for trinnet eller for heile skulen dykkar om mobiltelefonar, resirkulering av mobiltelefonar og gjenbruk av mobiltelefonar.

Undersøkinga skal vise mobiltrendane blant elevane på skulen din, og ho skal vise om dei tenkjer på – og om dei kjenner til – berekraftig mobilbruk.

Gruppene blir samde om kva spørsmål de må stille for å få svar på det de lurer på, og om kva type undersøking de vil lage. Det blir anbefalt at halve klassen jobbar med kvalitative undersøkingsmetodar, og at den andre halvparten jobbar med kvantitative undersøkingsmetodar – slik at de får både breidd og djupne i svara dykkar.

Kvar gruppe skal skrive ein rapport om funna frå undersøkinga og lage ein presentasjon der hovudfunna frå undersøkinga blir lagde fram munnleg for klassa.

Ei eventuell forlenging av oppgåva

Som ei forlenging av denne oppgåva kan de gjerne jobbe med oppgåva om å lage ein haldningskampanje som oppmodar medelevar til å behalde mobiltelefonar lenger og resirkulere gamle mobiltelefonar.