Fag

Oppgåve

Video

Interaktivt innhald

Lær om komposisjon i eit 360-galleri

I denne oppgåva skal du bevege deg i eit 360-galleri for å lære meir om komposisjon i bilete. Etterpå skal du bruke det du har lært, til å studere korleis andre bruker komposisjonsprinsipp i verka sine.

Seks rader og fem kolonnar med abstrakte komposisjonar i svart-kvitt. Illustrasjon. — Vasilij Kandinskij sette saman 30 abstrakte komposisjonar i Thirty (1937). Legg merke til korleis kvar rute fungerer kvar for seg og korleis dei til saman skaper ein heilskap.

Til læraren

Hovudtelefonar til lytting i galleriet
Be dei elevane som har hovudtelefonar eller øyreproppar, om å ta dei med slik at dei kan lytte til beskrivinga når dei ser på dei ulike bileta. Ha gjerne nokre til utlån dersom skulen har slike tilgjengeleg.

Del 1: Reflekter og diskuter

Å komponere betyr å setje saman enkeltdelar til ein heilskap. Tenk over korleis du bruker komposisjon i kvardagen din. Start til dømes med kva klesplagg du vel å kombinere når du kler på deg om morgonen.
Gå saman i grupper på to–tre elevar og diskuter korleis kunnskap om komposisjon kan hjelpe dykk når de skal skape visuelle uttrykk.

Del 2: Utforsk

No skal du lære om komposisjonsprinsipp og konsentrere deg om romma i den nedste etasjen i 360-biletgalleriet. Start med å sjå instruksjonsfilmen under (lengde 1:51).

Video: Hilde Gullhaug Hennes / CC BY-SA 4.0

Instruks

Gjennomfør ei gallerivandring i første etasje, og lær ved å lytte til informasjonen ved dei ulike bileta.

Klikk deg inn på kvart enkelt bilete. Bruk hovudtelefonar eller øyreproppar og lytt til beskrivinga mens du studerer biletet nærare.
Notar viktige komposisjonsprinsipp ut frå kva du ser, les eller høyrer i galleriet. Del gjerne inn notata ut frå namna på romma du besøker i galleriet. (Du finn ei oversikt i boksen under.)

Namn på romma i første etasje

Djupneverknad
Biletutsnitt
Format og linjer
Biletvinkel
Balanse og gjentaking

Del 3: Visualiser fem komposisjonsprinsipp

Sjå gjennom notata dine. Vel ut minst fem setningar av det du har skrive i løpet av gallerivisninga, som du vil hugse på og ta med deg i eige skapande arbeid. Visualiser desse prinsippa i skisseboka di.

Nokre viktige fagord som blir presenterte i galleriet

Balanse: handlar om korleis elementa i eit bilete er fordelte. Ein godt balansert komposisjon kan gjere biletet meir behageleg å sjå på.
Biletutsnitt: beskriv kor nært innpå motivet kunstnaren/fotografen vel å gå.
Biletvinkel: refererer til vinkelen eller posisjonen kunstnaren/fotografen har i forhold til motivet sitt. Dette kan påverke korleis motivet blir oppfatta av den som ser biletet etterpå.
Djupne: påverkar korleis vi oppfattar avstand. Vi kan få noko til å sjå nært ut, og andre ting til å sjå ut som dei er lenger unna. Vi kan skape djupne i teikningar og måleri ved å bruke perspektiv, storleiksforskjellar og overlapping.
Format: er forholdet mellom breidda og høgda på eit bilete.

Del 4: Studer komposisjonsprinsipp i andre sine bilete

Ta utgangspunkt i notata dine frå gallerivisninga og finn tre eller fleire bilete på nettet, i bøker eller i magasin. Vel bilete som har brukt ulike komposisjonsprinsipp. Samarbeid gjerne med medelevar.
Vis nokre av bileta for klassen, og forklar korleis komposisjonsprinsippa er brukte. Bruk fagorda du har lært gjennom gallerivandringa.