Oppgåve

Fargeblanding med fargeblyantar

Med berre nokre få fargeblyantar kan du blande to eller fleire fargar og på den måten oppnå nye fargetonar og nyansar. Lag deg ei oversikt over fargeblandingar du kan få fram med nokre utvalde fargeblyantar.

Eit rutenett med fargar laga med fargeblyantar. Foto. — Her er det få fargeblyantar, men mange fargetonar og nyansar som er oppnådde med å kombinere kvar farge med ein annan. Kvitleiken i papiret kan òg utnyttast for å oppnå lyseffektar.

Lag nye fargetonar og nyansar

Med fargeblyantar kan du teikne detaljert og med klare, fine fargar. Av og til må du justere fargen for at det du teiknar, skal få det uttrykket du er ute etter. Til dømes vil ein grønfarge bli heilt annleis viss du kombinerer han med raudt. Sidan grønt og raudt er komplementærfargar, vil dei dempe kvarandre. Treng du ein heilt annan grøn enn den du har, kan du blande din eigen ved å kombinere gult og blått. Bruk det du veit om fargeblanding for å få meir ut av fargeblyantane dine!

Jobb systematisk med utprøvingar i eit rutenett

Teikn opp eit rutenett på eit teiknepapir eller i skisseboka di. Du treng like mange ruter vassrett som loddrett. Talet på ruter må du tilpasse etter kor mange fargeblyantar du vil bruke til fargeblandinga. Du kan starte med fem til sju fargar, men planlegge for at du kan halde fram med opptil tolv fargar.

Relatert innhald

Komplementærkontrast

Komplementærfargane står rett overfor kvarandre i fargesirkelen. Dei framhevar og forsterkar kvarandre.