Oppgåve

Utforsk hovudets proporsjonar

Korleis er dei ulike delane av ansiktet plassert i forhold til kvarandre? Samarbeid med ein medelev. Bruk sikteteknikk til å utforske ulike storleikar og plasseringar når du skal teikne eit hovud.

Teikning av hovudet til ein mann sett i profil. Hjelpelinjer markerer plassering og storleiksforhold. Foto. — Proporsjonane i hovudet teikna av Leonardo da Vinci (cirka 1490). Han studerte anatomi og proporsjonane i menneskekroppen.

Utstyr

teikneblyant
teikneblokk eller skissebok

Proporsjonar

Proporsjon er forholdet mellom storleikar. I denne øvinga skal de samarbeide to og to. Byt på å sitje modell og på å måle og finne ut kvar ulike delar av ansiktet er plasserte i forhold til kvarandre.

Ei skisseteikning ved sida av eit foto av ein gipsmodell av eit mannshovud. Ei hand held ein blyant og måler avstand. Illustrasjon. — Sikteteknikk er nyttig for å samanlikne storleikar. Hald armen strak når du måler slik at du heile tida har same avstand til motivet ditt. Viss du måler avstanden mellom auga og haka og mellom auga og toppen av hovudet, kan du finne ut kvar auga er plasserte.

Del 1: Ansiktet sett framanfrå (en face)

Bruk blyanten til å sikte, og finn ut:

Kvar i høgda på hovudet ligg auga til modellen din?
Hald blyanten horisontalt og sjekk kor mange auge det er plass til mellom auga.
Bruk blyanten til å sikte vertikalt. Finn ut kvar pupillane treffer munnvikane når modellen din ser rett fram.
Fortset å sikte vertikalt. Kvar er nasevengen plassert i forhold til augekroken?
Mål avstanden frå hakespissen til augnebryna. Snu blyanten og samanlikn denne storleiken med avstanden mellom kinnbeina.

Lag ei enkel skjemateikning som beskriv storleiksforholda du kjem fram til når du måler.

Del 2: Ansiktet sett frå sida (profil)

Hald blyanten horisontalt og sikt frå nasetippen på modellen din. Kvar begynner bakhovudet i forhold til denne linja?
Fortset å sikte horisontalt og sjekk kvar den øvre og nedre kanten av øyret treffer auget og nasen til modellen.
Mål avstanden frå hakespissen til augnebryna og samanlikn denne storleiken med avstanden frå nasetippen til øyret.

Lag ei heilt enkel skjemateikning som viser det du kjem fram til.

Del 3: Individuelle forskjellar?

Samanlikn skjemateikningane dine med teikningane medeleven din laga etter å ha målt proporsjonane dine. Kjem de fram til same resultat, eller finn de individuelle forskjellar?