Skrik ut med Munch!

Del 1: Forarbeid

1) Bli kjend med Edvard Munch (1863–1944)

1. Start med å sjå introduksjonsfilmen om Edvard Munch (lengde 7:55) frå Munchmuseet.

2. Bruk kjelder og skriv ein kort, sjølvstendig digital tekst om noko du synest er viktig å vite om Munchs liv og kunstnarskap (cirka 200 ord). Finn ei passande overskrift, og bruk gjerne biletdøme. Pass på å få med rett biletkreditering og å oppgi kjeldene du har brukt. Til slutt skriv du ut teksten og limer han inn i skisseboka di.

2) Studer Skrik og reflekter

Skrik er eit av Edvard Munchs mest kjende motiv. Han laga fem versjonar av det og brukte ulike teknikkar.

Før Skrik blei eit bilete, beskreiv Munch motivet i eit dikt i dagboka si den 22. januar 1892:

"Jeg gik bortover
veien med to
venner – så gik
solen ned
Himmelen ble
pludseli blodi rø
– Jeg standset, lænet
mig til gjæret træt
til døden – over den
blåsorte fjor og by
lå blod i ildtunger
Mine venner gik
videre og jeg sto
igjen skjælvende
af angest –
og jeg følte det gik et
stort uenneligt
skrig gennem
naturen"

Studer måleriet Skrik. Reflekter og svar skriftleg og sjølvstendig på spørsmåla, og lim dei inn i skisseboka. Bruk overskrifta: Refleksjonsspørsmål – Skrik.

1. Kva synest du om Skrik og måten biletet er laga på?

2. Kvifor trur du at Skrik har blitt så berømt og populært?

3. Kva betydning kan biletet ha i dag? Grunngi svaret.

3) Undersøk korleis Skrik er brukt som referanse i andre verk

Del 2: Skap ein biletparodi av Skrik

Bruk menneskefiguren i Skrik som referanse i ein sjølvstendig prosess fram til ein ferdig utarbeidd biletparodi. Vi skal kunne kjenne igjen skrikfiguren.

Skrik-motivet er utømmeleg. La deg inspirere av boka Skrik: parodier av Arvid på Nasjonalbiblioteket. Illustrasjonane er av Arvid Andreassen, teksten av Arvid Bryne.

Når vi bruker ein referanse på denne måten, lagar vi ein slags humoristisk parodi. Ein parodi er ei latterleggjerande etterlikning, eit vrengebilete. Samtidig kan parodien ha ein bodskap utover det reint humoristiske, og du kan derfor òg bruke andre vinklingar i same bilete:

• nyheitsaktuell vinkling

• samfunnskritisk vinkling

• vinkling frå kvardagslivet

• kopling til andre kunsthistoriske referansar

• referansar frå populærkulturen

Idéutvikling

Idémyldring

Jobb med inspirasjon og rik idémyldring i skisseboka di. Vis ein frodig og utforskande visuell prosess. Du kan arbeide både analogt og digitalt. Ta skjermbilete av digitalt arbeid, slik at du kan dokumentere denne delen av prosessen òg.

Vidareutvikling av idéane

Du skal jobbe analogt i denne fasen og utforske ulike svart-kvitt-teknikkar. Prøv òg å kombinere dei slik at du blandar teknikkane.

Her kan du la deg inspirere av Iben Sandemoses illustrasjonar, til dømes i biletboka Det vokser ikke hvitløk på Skillebekk på Nasjonalbiblioteket.

Du kan legge inn litt tekst og la skrifta bli ein visuell del av parodien. Dette kan du bruke til å forsterke innhaldet eller leie betraktarens forståing av motivet.

Skriv korte faglege kommentarar til skissene om idéar og val av visuelle verkemiddel som teknikk, komposisjon, fargebruk og så vidare.

Gjennomføring

Det ferdige A3-biletet skal utførast i svart-kvitt-teknikkar med til dømes tusj, pennar og måling.

Du kan òg bruke gråtonevalørar og ein eller to kulørte fargar på utvalde stader for å understreke bodskapen eller skape eit interessepunkt og ein visuell effekt.

Eigenvurdering

Svar til slutt skriftleg på desse refleksjonsspørsmåla:

1. Fekk du idéen din godt fram i din eigen skrikparodi? Grunngi svaret.

2. Ville du gjort noko annleis om du skulle løyst oppgåva på nytt?

3. Kva har du lært?

Innlevering

Dette skal du levere inn:

• ei skissebok med

  • tekst om Edvard Munch

  • svar på refleksjonsspørsmåla

  • dokumentasjon av idéutvikling og arbeidsprosess

  • eigenvurdering

• ein ferdig skrikparodi på A3 teikneark. Monter gjerne teikninga på svart kartong.

Under kan du laste ned og sjå eit døme på korleis ein elev har jobba med den visuelle delen av dokumentasjonen i skisseboka si.

• Hilmas prosesshefte(PDF)