Oppgåve

Mål som ein impresjonist

I denne oppgåva blir du kjend med impresjonismen som kunsthistorisk periode. Du skal utforske verknaden av lyset på fargane og studere same motiv under ulike lysforhold. Eksperimenter med raske, synlege penselstrøk, eller prøv å gi att ulike lysforhold med pastellkrit.

Åtte bilete av katedralen i Rouen. Illustrasjon. — Claude Monet var oppteken av korleis det skiftande lyset påverkar fargane. Gjennom fleire månader i 1892–93 måla han ein serie på 20 bilete som gir att ulike lysforhold på fasaden til katedralen i Rouen.

Utstyr

kamera eller mobil
skissebok eller skisseblokk i A3-format
lerret eller bokpapp
akrylmåling, gouache eller pastellkrit
penslar

Del 1: Set deg inn i impresjonismen som periode

Les fagartikkelen om impresjonisme. Beskriv kort kva som kjenneteiknar perioden.
Finn eit impresjonistisk måleri og beskriv motiv, fargar og penselstrøk. Gå tett på motivet og beskriv opplevinga di av måleriet når du ser det på nært hald, og når du ser det på avstand.

Oljemåleri av vassliljer og fargespel som blir reflektert i vatn. Foto. — *Vassliljedammen* av Claude Monet (1900).

Del 2: Eksperimenter med penselstrøk eller pastellkrit

Finn eit utsnitt av det måleriet du beskreiv i del 1, og kopierer dette.
Forsøk å gjenskape fargebruken og verknaden av dei synlege penselstrøka i ei fargeskisse.

Oljemåleri av roser og anemonar i ein vase. Foto. — *Anemonar og roser* av Pierre-Auguste Renoir (1890). Her kan du zoome deg inn på detaljar og studere korleis kunstnaren gir att lys- og skuggeverknader med røffe penselstrøk.

Pastellteikning av to ballerinaer som strekker ut ved ei ballettstong. Foto. — *Dansarar ved barren* av Edgar Degas (1888). Her kan du studere korleis Degas har brukt pastellkrit til å gi att korleis fargane blir påverka av lyset.

Del 3: Gjengi eit motiv under ulike lysforhold

Vel eit motiv. Det kan til dømes vere ein bygning, ein person eller eit stilleben nær eit vindauge. Vurder korleis du vil bygge opp komposisjonen om du vil jobbe med eit stilleben.
Fotografer motivet under ulike lysforhold. Det kan vere naturleg lys om morgonen, ettermiddagen og tidleg kveld eller lampelys. La deg inspirere av korleis impresjonistane kunne skjere til eit motiv.
Prøv ut ulike teknikkar før du bestemmer deg for om du vil bruke akryl eller gouache, pastellkrit eller blandingsteknikk.
Lag skisser.
Studer korleis fargetonane endrar seg i ulike lysforhold, og gjengi motivet ditt på minst to ulike måtar. La deg inspirere av bilete frå perioden.

Tre impresjonistiske måleri av same brumotiv ved sida av kvarandre. Illustrasjon. — Tre versjonar av *Den japanske brua* av Claude Monet. Det heilt til venstre er måla i 1920, det i midten i 1922 og det heilt til høgre i 1929.

Innlevering

Til slutt skal du levere

to (eller fleire) måleri eller pastellkritteikningar av same motiv
eit prosesshefte der du
- presenterer fotografia som var utgangspunktet for prosessen din
- viser korleis du har eksperimentert med teknikkar
- presenterer skissene og grunngir vala du har teke undervegs
- vurderer det endelege produktet ditt og forklarer korleis du har brukt utsnitt, teknikk og fargar som ein impresjonist

Relatert innhald

Akrylmåling og måleteknikkar

Akrylmåling er godt eigna både til måleri og til å måle på gjenstandar. Her er ei oversikt over kva akrylmåling er, utstyr og måleteknikkar.

Pastellkrit

Pastellkrit har klare, sterke fargar, og ulike teknikkar gir heilt ulike uttrykk. Her får du forslag til nokre teknikkar du kan prøve.