Oppgåve

Akvarellmåling trinn for trinn

Har du lyst å lære å måle akvarellar? Då kan du følge denne instruksjonen trinn for trinn. Med same framgangsmåte kan du måle kva motiv som helst. Her startar vi med å studere former og fargar i eit fotografi av nokre tomatar.

Ein klase tomatar måla med akvarell. Illustrasjon. — Mørke og lyse valørar gir ein illusjon av djupne og lys. Legg merke til korleis dei grøne delane overlappar kvarandre, og korleis dei ulike valørane skaper kontrast.

Last ned fotografiet av tomatane(PDF)

Øving i å måle med akvarellmåling

Viss du følger alle trinna i denne øvinga, lærer du mykje om korleis du kan meistre akvarellmåling. Du bør bruke eit papir som er berekna for akvarellmåling og som toler at du bruker penselen til å omarbeide overflata etter at målinga er tørr.

1. Teikn opp motivet

Akvarellmåling er mykje enklare når du teiknar opp motivet på førehand. Teikn med svake blyantstrekar slik at papiret ikkje blir skadd. Eit alternativ til gråblyant er å bruke vasslauslege fargeblyantar. Strekane frå dei vil løyse seg opp når du målar, og bli ein usynleg del av akvarellen. Finn dei fargane som passar med det motivet du skal måle.

Hugs å markere kvar det skal vere høglys. Der bør du behalde det kvite i papiret.

Tomatar og stilkar teikna opp med fargeblyantar. Illustrasjon. — Her er det brukt raudoransje og grøne vasslauslege fargeblyantar til å teikne opp detaljane. Legg merke til at også dei høglyse partia er markerte.

2. Første strøk med måling

Start med å måle dei grøne delane av tomatane med eit lyst, tynt lag med måling. Ikkje bruk for våt pensel. Eit slikt lag med tynn måling blir kalla ei lavering. Det gjer ingenting om fargen blir ujamn. Du skal legge fleire lag over dei første laveringane.

La fargen tørke heilt før neste trinn.

Teikning av tomatar der stilkane og begerblada er måla grøne. Illustrasjon. — Første lag med måling skal vere ganske lyst. Det betyr at du har lite fargepigment i forhold til vatn.

3. Første lag på tomatane

Når det du allereie har måla, har tørka, skal du legge på neste lavering. I dette dømet er raudfargen blanda inn med litt gult for å gi ein litt varmare tone.

No er det viktig at du unngår å måle over dei stadene du har markert for høglys på kvar tomat. Ein pensel med god spiss er fin å bruke til dette trinnet.

Detalj av ein akvarell av tomatar. Illustrasjon. — Tomatane har fått det første laget med begge fargane. Vi beheld det kvite i papiret der det skal vere høglys.

4. Valørar og utjamning

No er tida inne for å legge på lag med måling som har tjukkare konsistens. Sjå nøye på referansebiletet for å finne dei mørke valørane.

Skape djupare valørar

Du kan blande djupare valørar av grønfargen ved å blande inn litt av raudfargen. Desse fargane er jo komplementære. I dømet er det blanda inn raudleg brunt for dei mørkaste valørane av grønt. Dei djupaste valørane av raudt er måla ved å bruke tjukkare konsistens på målinga.

Detaljar frå ein akvarell der tomatar og stilkar er måla i ulike valørar. Illustrasjon. — Ved å skape mørkare og lysare valørar får du fram djupne i motivet.

Løfte ut og jamne ut måling

For å få lysare parti og mjukare, meir utjamna kantar rundt høglysa og på stilkane, er målinga på papiret fukta opp igjen og løfta ut. Til denne teknikken treng du ein rein pensel. Dypp han i vatn, men tørk av vatnet på eit tørkepapir slik at han berre er fuktig. Deretter går du over med penselen for å løyse opp målinga på papiret. Pigmenta kan då løftast ut ved å trykke lett med tørkepapiret. Du kan òg jamne ut og flytte pigmenta på papiret. Skyl og tørk penselen undervegs for å unngå å få måling på stader der du ikkje ønsker det.

Akvarell av tomatar. Illustrasjon. — Her er dei stjerneforma begerblada måla i mørkare valørar og sidestilkane haldne lysare. Høglysa på tomatane er mjukna opp ved å bløyte opp og løfte ut pigmenta langs kantane.

5. Bakgrunnsfarge

Du treng ikkje å kopiere fotografiet. For å få eit meir interessant uttrykk har vi lagt motivet på ein jamn, gul bakgrunn. Du kan prøve andre bakgrunnsfargar viss du vil.

Tomatar måla med akvarell på eit gult underlag. Illustrasjon. — Uttrykket blir forandra når du legg på ein tredje farge som bakgrunn.

6. Dei siste justeringane

Tomatar måla med akvarell. Valørar skaper djupne i biletet. Illustrasjon. — For å skape eit tydelegare uttrykk er det lagt på ei varmare lavering på bakgrunnen. Tomatane har òg fått eit ekstra lag med raudt for å auke kontrasten i valørane.

Det er ein kunst i seg sjølv å vite når biletet er ferdig. Det går alltid an å gjere litt meir. Her er uttrykket forsterka ved å legge på ekstra varme i bakgrunnsfargen og ved å gjere dei raude valørane i tomatane djupare.

Relatert innhald

Akvarellmålingsteknikkar

Lær om ulike teknikkar innan akvarellmåling, og eksperimenter med verknadene av dei.

Akvarellmåling

Akvarellmåling er praktisk og lett å ta med seg. Fargelaga er gjennomsiktige, og du kan bruke akvarellmåling både til skisser og ferdige kunstverk.